Bilim jáne ǵylym mınıstri Ashat Aımaǵambetov Ortalyq kommýnıkasııalar qyzmetindegi brıfıngte koronavırýstyq ınfeksııadan qorǵaný maqsatynda qolǵa alynǵan bilim berý salasyndaǵy is-sharalar men oqytý prosesindegi ózgeristerge kezeń-kezeńimen toqtaldy.
Mektepke deıingi bilim. Mınıstrdiń habarlaýynsha, balabaqshalar elimizdegi tótenshe jaǵdaıǵa baılanysty shtattyq rejimde jumys isteıdi. Balalardyń mektepke deıingi uıymǵa barý-barmaýyn ata-analar sheshedi. Kelmegeni úshin balabaqshadan shyǵarylmaıdy, ıaǵnı balanyń orny saqtalady. Qazirgi tańda balalardyń 40 paıyzy ǵana mektepke deıingi mekemege baryp júr.
Orta bilim. Oqýshylar 2020 jylǵy 16 naýryzdan bastap 5 sáýirge deıin kóktemgi demalysta bolady. Muǵalimder atalǵan merzimde qashyqtyqtan jumys isteıdi. Al mektep dırektorlary muǵalimderdiń qashyqtyqtan jumys isteýi jáne kanıkýl kezinde atqarylatyn jumys kólemine saı jalaqyny tolyq tóleý týraly aktilerdi qabyldaıdy. Eger kanıkýldan keıin de oqýshylar mektepke bara almasa, olardy qashyqtyqtan oqytýdyń múmkindikterin mınıstrlikte qurylǵan arnaıy top qarastyrmaq. A.Aımaǵambetov mektep oqýshylaryn qashyqtyqtan oqytýǵa daıyndyqtyń 5 sáýirge deıin aıaqtalatynyn aıtty. Sondaı-aq pedagogterdiń biliktiligin arttyrý kýrstary onlaın-formatta ótkiziledi. Keıbir kýrstardy ótkizý bıylǵy jyldyń ekinshi jartyjyldyǵyna aýystyryldy.
Qosymsha bilim. 16 naýryzdan bastap memlekettik qosymsha bilim berý uıymdarynyń (oqýshylar men jasóspirimder saraıy, mýzyka, kórkemsýret, óner mektepteri jáne taǵy basqa) qyzmeti toqtatyldy. Vedomstvo janyndaǵy Balalardyń quqyqtaryn qorǵaý komıteti qazirgi jaǵdaıdy eskere otyryp, ata-analarǵa balalaryn jekemenshik damytý ortalyqtaryna da jibermeýge keńes beredi.
Kásiptik jáne tehnıkalyq bilim. Kolledjderde qashyqtyqtan oqytý máselesi boıynsha birqatar qıyndyq bar. Barlyǵynda birdeı múmkindik bolmaı tur. Soǵan qaramastan kolledjderdiń basym bóligi tıisti júıe boıynsha jumys istep kórgen. Qalǵandary qatarǵa qosylyp keledi. Qazir arnaıy júıelerge kontent júkteý, oqý-ádistemelik keshendi engizý, sondaı-aq sandyq bilim berý resýrstary boıynsha aýqymdy jumys atqarylyp jatyr.
Joǵary bilim. Qashyqtyqtan oqytý júıesi otandyq ýnıversıtetterdiń bilim berý úderisi úshin jańalyq emes. Bilim jáne ǵylym mınıstrligi buıryqqa qol qoıǵan sátten bastap, arnaıy tehnologııalardy paıdalanyp júrgen keıbir JOO-lar onlaın-formatta oqytýdy bastap ketti. Oqý prosesin uıymdastyrý úshin oqytýshylar men stýdentterge elektrondy platformalarǵa kirýge jaǵdaı jasalady. Oqytý quraly retinde vıdeo-sabaqtar, derbes onlaın-jumys, onlaın-kýrstar paıdalanylady. Bizde «Bilimland», «Google Classroom», «MOODLE», «Univer», «Platonus», «Canvas», «Daryn.online» syndy jaqsy júıeler bar. Sondaı-aq «Coursera» óz kýrstaryn tegin usyndy jáne «ZOOM» oqytý barysynda servısti aqysyz qoldanýǵa múmkindik bar.
Mınıstr málimdegendeı, bılet nemese qarjy tapshylyǵy syndy ártúrli jaǵdaılarǵa baılanysty qaladan kete almaıtyn stýdentter jataqhanalarda tura beredi. Biraq olar tek óz bólmelerinde bolýlary tıis.
Aıta keteıik, tótenshe jaǵdaı kezinde bilim alýshylar men tárbıelenýshilerdiń halyqaralyq sporttyq, mádenı, týrıstik is-sharalarǵa qatysýyna jáne buqaralyq sharalardy uıymdastyrýǵa tyıym salyndy. Sonymen qatar jalpy bilim beretin pánder boıynsha oqýshylardyń respýblıkalyq olımpıadasy men aýyl mektepterine arnalǵan «Myń bala» Ulttyq zııatkerlik olımpıadasynyń IV kezeńin jáne basqa da konkýrstardy ótkizý merzimi keıinge shegerildi.