Qazaqstan Qarýly kúshteri Áskerı-tarıhı mýzeıi Ekinshi dúnıejúzilik soǵysqa qatysýshylardyń fotosýretteri men maıdan hattaryn jınaý is-sharasy bastaldy. Jınalǵan materıaldar mýzeıdiń atrıýmynda ornalastyrylatyn «Er esimi – El esinde» biregeı fotogalereıasyna kiredi.
Jobaǵa qatysý úshin árbir qazaqstandyq úı muraǵattarynan Uly Otan soǵysynyń fotosýretteri men oqıǵalarymen bólise alady. Is júzinde árbir qazaqstandyq otbasynyń Jeńiske qatysty óz tarıhy bar. Alaıda olardyń jaýyngerlik erlikteri, jaralanǵan, tutqyndalǵan ne bolmasa habar-osharsyz ketkender týraly málimetteri, taǵdyrlary soǵyspen qatar kelgen adamdar týraly málimetter áli de kóptegen qazaqstandyqtar úshin belgisiz.
Atalǵan joba soǵysqa qatysýshylardyń eren erlikterin máńgi este saqtaý jáne tarıhı mańyzdylyǵyn ushtastyrý, sonymen qatar Uly Jeńistiń 75 jyldyǵyna oraı otandastardy biriktirýge arnalyp otyr.
Materıaldarda kelesi málimetter bolýy kerek (eger belgili bolsa): áskerı ataǵy, aty-jóni, týǵan kúni men týǵan jeri, qashan jáne qandaı áskerı komıssarıattan shaqyrylǵan, qolda bar nagradalary, fotosýretteri.
Materıaldardy myna elektrondy poshtaǵa jiberýge: mhm.kazakhstan@gmail.com nemese 010000, QR QK Ulttyq áskerı-patrıottyq ortalyǵynyń Áskerı-tarıhı mýzeıi meken-jaıyna jiberý qajet. Qosymsha suraqtardy myna baılanys telefonynan bilýge bolady : + 7 (7172)44-26-13.
Áskerı-tarıhı mýzeıdiń izdestirý-ekspedısııalyq bólimshesi Ekinshi dúnıejúzilik soǵys kezinde qaza tapqan jáne habar-osharsyz ketkenderdi izdeý jáne esepke alý boıynsha turaqty negizde jumys júrgizetinin atap ótken jón. Budan basqa, qazaqstandyq jaýyngerlerdiń aqparattyq derekteri biryńǵaı bazaǵa jınaqtalyp, júıelenedi.