«Atameken» Ulttyq kásipkerler palatasynyń apparat basshysy Nuraly Bókeıhanov pen Kásipkerler quqyǵyn qorǵaý departamentiniń dırektory Shyńǵys Temir tótenshe jaǵdaı kezindegi kásipkerlerge arnalǵan shtabtyń jumysy boıynsha túsinikteme berdi.
Ulttyq kásipkerler palatasy 16 naýryzda arnaıy jedel shtab qurdy. Oǵan 3 kún ishinde 6000-ǵa jýyq ótinish túsken. Eldegi jaǵdaıǵa baılanysty kompanııalar jumysshylaryn qysqartýǵa májbúr. Kásipkerler shıkizattyń jetispeýshiliginen nemese kúrt qymbattaýynan zarbap shegip otyr. Soǵan oraı ǵımarat jáne jer jaldaý aqysyn tóleý merzimin uzartýdy ári salyqtan ýaqytsha bosatýdy suraıdy.
–Bul qıyndyqtardyń deńi shekara jabylýy men arnaıy qaýipsizdik sharalaryn engizý saldarynan týyndap otyr. Jalpy ótinish jibergen kompanııalardyń 85 paıyzy shaǵyn bıznes, 13 paıyzy orta bıznes, 2 paıyzy iri bıznes ókilderi. Shaǵym jasaǵan kampanııalardyń jartysy Nur-Sultan men Almaty qalalaryna tıesili, – deıdi N. Bókeıhanov.
Kásipkerlerdiń 60 paıyzy qarjylaı qıyndyqqa tap bolǵan. Sondyqtan kásiporyndar eńbek resýrstaryn saqtaýǵa ótemaqy berýdi ótinip otyr. «Aıtylǵan usynystar memlekettik organdarǵa jiberildi. Olarmen arnaıy sharalar júrgizilip jatyr. Eń birinshi qoldanylatyn shara kásipkerlerdi salyqtan bosatý. Aldaǵy jańalyqtardy kásipkerler atameken.kz portalynan bile alady» dedi Sh. Temir. Onyń aıtýynsha keıbir banktar óz tutynýshylaryna jeńildikter jasaǵan. Olardyń nesıe boıynsha mindettemelerin 90 kúnge keıin shegeripti. Búginde bul jumystar basqa da banktermen júrgizilýde.
«Atameken» Ulttyq kásipkerler palatasy tolyqtaı onlaın rejimge kóshti. Soǵan saı kásipkerlerge arnaıy call-sentr uıymdastyrǵan. Kez kelgen kásipker1432 nómirine habarlasyp, kókeıdegi suraqtaryna jaýap ala alady.
Muhtar KÚMISBEK