21 jáne 25 naýryz aralyǵynda Almaty qalasyndaǵy aqsha aıyrbastaý oryndary saǵat 10.00-den 16.00-ge deıin ǵana jumys isteıdi. Bul jóninde qala ákimdiginiń baspasóz qyzmeti habarlady.
Mundaı sheshimdi Almatydaǵy koronavırýs taralýynyń aldyn alý jónindegi aımaqtyq jedel shtab qabyldaǵan. Búginde dollor baǵamynyń kúrt ósýine baılanysty shetel valıýtasyn satyp alýshylardyń sany artyp otyr.
Ákimdiktiń habarlamasynda: «Qaladaǵy aqsha aıyrbastaý oryndarynyń jumys ýaqytyna shekteý engizildi. 2020 jyldyń 21 naýryzynan 25 naýryzyna deıin barlyq aqsha aıyrbastaý oryndary, onyń ishinde ekinshi deńgeıli bankter de saǵat 10.00-den 16.00-ge deıingi jumys kestesine kóshedi», dep jazylǵan.
Este bolsa, buǵan deıin Nur-Sultan qalasyndaǵy aqsha aıyrbastaý oryndary da jumys ýaqytyn ózgertip, 21-25 naýryz aralyǵynda saǵat 10:00-den 16:00-ge deıingi jumys kestesine kóshken bolatyn.