Kezinde áýesqoılar arasynda Olımpııa oıyndarynyń jeńimpazy, álem jáne Eýropa chempıony atanǵan Ýkraınanyń maqtanyshy Aleksandr Ýsıktiń bul kúnderi kásipqoı rıngti shaıqap, tolaǵaı tabystarǵa qol jetkizgeni barshaǵa málim.
2011 jyly Bakýde ótken álem chempıonatynyń fınalynda Ýsık rıng qojaıyny Teımýr Mamedovpen kúsh synasty. Sol básekeniń qarsańynda beımálim adamdar kelip, eger ol ázirbaıjandyq boksshyǵa jeńiletin bolsa, mol kólemde qarjajatty qaltasyna basatyny jaıyndy usynys aıtypty. Bul jaǵdaıdy Ýkraınanyń óreni «2+2» telearnasyna bergen suhbatynda málimdedi.
– Maǵan kelip aqsha usyndy. Men ondaı qadamǵa barýdan bas tarttym. Sebebi, meniń Elızaveta degen qyzym bar. Erteń ol óskennen soń nemerelerim bolady. Solardyń «Senderdiń ákeleriń men atalaryń álem chempıonatyndaǵy altyn medalin aqshaǵa aıyrbastaǵan. Ol – satqyn» degen sózderdi estigenin qalamadym, - deıdi Aleksandr Ýsık.
Nátıjesinde fınaldyq jekpe-jek 25:15 esebimen Aleksandr Ýsıktiń paıdasyna sheshilip, ol álem chempıony atandy.