Álemde 1,5 mlrd oqýshy úıden oqıdy. Bul týraly BUU janyndaǵy bilim, ǵylym jáne mádenıet jumystarymen aınalysatyn IýNESKO uıymy habarlady. Búkil álemdi shýlatqan koronavırýstyń kesirinen 167 el óziniń mektep oqýshylaryn qashyqtan bilim alýǵa kóshirdi. Bul IýNESKO-nyń esebinshe qazir 1,5 mlrd balany qurap otyr.
Atalǵan halyqaralyq uıym mektepterin jabýǵa májbúr bolǵan elderdiń barlyǵyn jáne sol elderdegi jekemenshik uıymdardy oqýshylarǵa bilim berýdi jalǵastyrýǵa, qandaı jaǵdaı bolmasyn balalardyń bilim alýyn toqtatpaýǵa shaqyrdy. Dúnıeni dúrliktirgen dert bilim salasyna da edáýir qıyndyq ákeldi. Buǵan joǵarydaǵy yqpaldy uıymnyń álemdegi oqýshylardyń 87 paıyzy mektepke qatynaı almaı qalǵanyn jazǵanynan anyq kóz jetkizýge bolady. IýNESKO osyǵan oraı Bilim berý boıynsha jahandyq koalısııa qurdy.
IýNESKO-nyń bas dırektory Odre Azýle:
– Biz buǵan deıin eshqashan bilim berý úderisiniń dál osyndaı keń kólemde buzylysymen betpe-bet kelmedik. Seriktestik qarym-qatynas – alǵa jyljýdyń jalǵyz joly. Koalısııa oqýshylar men muǵalimderdi ǵana emes, sonymen qatar qalpyna keltirý prosesi kezinde de qoldaý kórsetetin ınklıýzıvtilik pen teńdikke baǵyttalǵan sheshimderdi izdestirý úshin úılestirilgen jáne ınnovasııalyq is-qımyldarǵa shaqyrýdy kózdeıdi, – dedi.
Aıta keteıik, búginde Microsoft, GSMA, Weidong, Google, Facebook, Zoom, KPMG, Coursera sekildi iri jeke sektorlar Koalısııaǵa qosylyp, Khan Academy, Dubai Cares, Fundación Profuturo kommersııalyq emes uıymdar múshe bolǵan.
IýNESKO-nyń resmı saıtynda alpaýyt Bı-bı-sı arnasynyń álemdegi oqýshylar men stýdentterdiń qaýipti indet týraly tanymyn keńeıtýge atsalysyp, koalısııany qoldaǵany jáne osyndaı úlken medıa korporasııasynan ózgelerdiń de úlgi alýy kerektigi jazylǵan. Al jazbanyń sońynda Koalısııaǵa qoldaý kórsetkisi keletin uıymdarǵa, azamattyq qurylymdarǵa habarlasý úshin tómendegi anyqtama málimetteri kórsetilgen:
Kler O'Hagan – IýNESKO-nyń baspasóz qyzmeti;
elektrondy poshta – c.o-hagan@unesco.org
telefon nómiri +33 01456 81729.