Biz osyǵan deıin oqýshylardyń sońǵy toqsandy qashyqtan oqıtynyn habarlaǵanbyz. Bilim jáne ǵylym mınıstri Ashat Aımaǵambetov jańa formattyń qalaı júzege asyrlatynyn aıtty.
Qashyqtan oqytý týraly qoǵamda jáne muǵalimder men ata-analar arasynda kóptegen saýaldardyń týyndaǵanyn jetkizgen mınıstr:
– Biz synı pikirlerdi estip te, kórip te otyrmyz. Degenmen, qashyqtan bilim berýge kóshý – koronavırýstyq ınfeksııanyń taralýyn azaıtýǵa baǵyttalǵan sharalar aıasynda júzege asyp jatqanyn barlyǵy túsingeni jón. О́kinishke oraı, basqa tańdaý joq. Oqý prosesi toqtatylmaýy tıis.
Biz osyndaı jaǵdaıǵa tap bolǵan basqa elderdiń tájirıbesin aldyn ala zerdeledik. Is júzinde olardyń barlyǵy qashyqtan oqý rejımine kóshken: búkil álem boıynsha 870 mıllıonnan astam oqýshy osyndaı formatta bilim alýda. Barlyq múmkindikterdi, aspektiler men táýekelderdi jan-jaqty oı eleginen ótkize otyryp, biz de ýaqytsha qashyqtan oqytýǵa kóshý týraly sheshim qabyldadyq, – dedi.
Vedomstvo basshysynyń málimdeýinshe, qashyqtan oqytýdy iske asyrý eki baǵyt boıynsha júrgizilmek.
Birinshiden, telearnalar arqyly sabaq ótkizý. Bul – tipti jańa format. Balapan jáne Elarna telearnalary bizge ózderiniń efırlik ýaqytyn usyndy. Túsirilim jumystary bastalyp ketti. Negizgi pánder boıynsha 2000-nan astam beınesabaq túsirý qajet.
– Men keshe túsirilim jumystary júrgizilip jatqan stýdııada boldym. Ssenarıı jazýshylardan, rejısserler men pedagogterden turatyn jumys toby árbir shyǵarylymdy muqııat pysyqtaýda. Bizdiń ustazdar telejúrgizýshi retindegi múldem jańa róldi meńgerip jatyr. Beınesabaqtar qazaq jáne orys tilderinde jazylýda. Bul ońaı is emes ekenin birden aıtqym keledi, dep jazdy A.Aımaǵambetov.
Al ekinshi baǵyt boıynsha arnaıy mamandandyrylǵan ınternet-platformalary arqyly sabaqtar ótkiziledi. Bul sıfrlyq júıeler oqýshylarǵa ótken sabaqty nemese buryn talqylanǵan taqyrypty qaıta qaraýǵa, sondaı-aq onlaın-sabaq ótkizýge, keri baılanys ornatýǵa, jeke dara oqytý men tapsyrmalardy geımıfıkasııalaýǵa zor múmkindik beredi. Sonymen qatar, bul format testileý jumystaryn ótkizýge jáne alǵan bilimderin baǵalaýǵa múmkindik jasaıdy.
Mınıstr buryn mundaı kompanııalardyń bilim berý kontentine qol jetkizý aqyly bolǵanyn, osy kezeńde bizdiń balalar barlyq kerek aqparatty jáne platformalardy tegin paıdalana alady. Tıisti kelisimge qol jetkizip otyrǵanyn atap ótti. Qosa keteıik, bilim berý resýrstaryn qoldanýǵa megabaıt alynbaıtyny týraly tolyǵyraq burynǵy materıalymyzdan oqı alasyz.