Qazaqstannyń Joǵarǵy oqý oryndary arasynda alǵashqylardyń biri bolyp qashyqtyqtan oqytý júıesin bastaǵan ál-Farabı atyndaǵy Qazaq Ulttyq ýnıversıtetinde dárister, semınarlar men tájirıbelik sabaqtar onlaın rejımde ótýde.
Birer kún buryn karantın jaǵdaıynda bilim ordasynyń qashyqtyqtan oqytý júıesimen tanysý maqsatynda ýnıversıtetke «Sanaly urpaq» jobasynyń jetekshisi Qaıyrjan Tokýshev jáne Sybaılas jemqorlyqqa qarsy is-qımyl Agenttiginiń Almaty qalasy boıynsha departament basshysy Elnar Igılıkov arnaıy barǵan. Bul týraly oqý oshaǵynyń baspasóz qyzmeti habarlady.
Qonaqtar qashyqtyqtan basqarý ortalyǵynda bolyp, ondaǵy oqý júıesi, sharýashylyq jáne basqa da JOO qyzmetteriniń baqylaný jaı-kúıin kórdi. Sapar barysynda olar sondaı-aq, qashyqtyqtan bilim berýdi aqparattyq súıemeldeý ortalyǵynyń jumysymen tanysty. «Sanaly urpaq» jobasynyń jetekshisi karantın erejelerin saqtaýǵa jáne kitap oqý men óz bilimin jetildirýge qolaıly ýaqytty paıdalanýǵa keńes berdi.
QazUÝ 16 naýryzdan bastap «Ýnıver» (univer.kaznu.kz) jáne «MOODLE» (dl.kaznu.kz) syndy eki aqparattyq-bilim berý júıesindegi qashyqtyqtan bilim berý tehnologııalaryn (QOT) engizdi. Oqytý barysynda ZOOM, Teams, DL jáne basqa da qosalqy sıfrlyq servıster qoldanylady.
QazUÝ-dyń oqý isi jónindegi prorektory Asqar Hıkmetov atap ótkendeı, ýnıversıtettiń damyǵan IT-ınfraqurylymy búginde 16 fakýltettiń barlyq stýdentterin qashyqtyqtan oqytýdy qamtýǵa múmkindik beredi. Ýnıversıtettiń úsh qurylymy qashyqtyqtan oqytýdy júrgizýde jetekshilik etedi. Máselen, «Ýnıver» júıesinde oqý úrdisiniń barlyq qyzmetin baqylaýǵa bolady. JBO qyzmetkerleri ár oqytýshynyń kestesin baqylaıdy jáne naqty ýaqyt rejıminde sabaqtardy teksere alady.
Búginde QazUÝ Stýdentter úıinde de eldegi tótenshe jaǵdaı saldarynan oryn alǵan buqaralyq is-sharalar men kezdesýler ótkizý toqtatyldy. Barlyq stýdenttik jataqhanalarda SOVID-19 aldyn alý boıynsha aqparattyq paraqshalar men stendter ilindi, jáne dezınfeksııalaý quraly bar dozatorlar ornatyldy.