Oral qalasynda turǵyndardyń áleýmettik osal toptaryn qoldaýǵa baǵyttalǵan «Qaıyrymdylyq kerýeni» aksııasy Qazaqstan halqy Assambleıasy janyndaǵy Eriktiler qozǵalysynyń bastamasymen taǵy bir aksııa ótkizdi.
Jalǵyzilikti qarııalarǵa, UOS qatysýshylary men tyl eńbekkerlerine, múmkindigi shekteýli balalarǵa azyq-túlik, antıseptıkalyq quraldar, dári-dármek pen medısınalyq betperde sekildi qajetti zattardy berý maqsatynda júrgizilgen qaıyrymdylyq aksııasyna Oral qalasynyń iri kásipkerleri, etnomádenı birlestikterdiń ókilderi, «Jańǵyrý joly» jastar qozǵalysynyń volonterleri jáne «BIRLIK», «Uralsk Runners» júgirý áýesqoılary klýby, «Dostyq» qazaq-vaınah klýby qatysty.
Atap aıtqanda «Beles-Agro» JShS, Jelaev astyq ónimderi kombınaty, «Batys Kúnbaǵys» aksıonerlik qoǵamy, «Sýrovskıı» dúkeni, «Matevosıan» JShS ózderi óndiretin makaron, et-sút ónimderin berse, keıbir kásipkerler medısınalyq betperde, parasetamol, asetıl men askorbın qyshqyldaryn taratty. Uly Otan soǵysy ardagerlerine medısınalyq dári qobdıshasy tabys etildi.
Sóıtip, Oralda ekinshi márte ótip otyrǵan «Qaıyrymdylyq kerýeni» aksııasyna 22 adam qatysyp, 7 kólikten turatyn kerýenmen 25 muqtaj otbasyna áleýmettik kómek jetkizdi.
Batys Qazaqstan