Batys Qazaqstan oblysy aýmaǵynda 31 naýryzdan bastap kúsheıtilgen karantın rejımi engizildi. Batys Qazaqstan oblystyq Bas memlekettik sanıtarlyq dárigeri Muhamǵalı Aryspaev qol qoıǵan Batys Qazaqstan oblysynyń aýmaǵynda koronavırýstyq ınfeksııanyń (COVID-2019) taralýyna jol bermeý jónindegi sharalardy kúsheıtý týraly qaýly 31 naýryz kúni 00.00. saǵatta kúshine endi.
Bul qaýly boıynsha Batys Qazaqstan oblysynda Oral qalasy men aýdandarynyń eldi mekenderi arasynda kólik quraldarynyń kirip-shyǵýyna tyıym salyndy. О́te qajet bolmasa, aýyl, kent, qala ishinde de adamdar men jeke kóliktiń qozǵalysyna tyıym salynyp otyr.
Jedel shtab bekitken salalar tizimine engizilgen uıymdarda qyzmet etetin jeke adamdar jumys ornynan anyqtama bolǵan jaǵdaıda úıinen jumys ornyna jáne jumys ornynan úıine barýǵa ruqsat etiledi.
Al úıindegi turǵyndar azyq-túlik pen dári-dármekti alý úshin tirkeýde turatyn jerinen 2 km radıýstaǵy dúkender men dárihanalarǵa ǵana bara alady. Úı janýarlaryn serýendetý 30 mınýt ishinde, 500 metr radıýsta júzege asady.
«Medısınalyq mekemelerge shuǵyl jaǵdaılarda ǵana barý, úıden tótenshe jaǵdaıda jáne adamnyń ómiri men densaýlyǵyna qaýip tóndiretin jaǵdaılarda ǵana shyǵý qajet» delingen qaýlyda.
Al týysqandarǵa, tanystarǵa, kórshilerge, áriptesterge jáne basqa jerlerge barýǵa, qoǵamdyq oryndarda, bir otbasynyń adamdaryn qospaǵanda, úshten artyq adamnyń jınalýyna, kámeletke tolmaǵandardyń úlkenderdiń ilesýinsiz qala boıynsha qozǵalýyna tyıym salynady.
Oblystyń bas sanıtary turǵyndardyń kúndelikti tirshiligin qamtamasyz etetin uıymdardy qospaǵanda barlyq uıymdar men kásiporyndardyń jumysyn ýaqytsha toqtatýdy, uıymdar men kásiporyndardyń kúsheıtilgen karantın ýaqytynda qalypty jumys rejımin toqtatyp, óz qyzmetin qashyqtan, sonyń ishinde onlaın rejıminde jalǵastyrýy tıistigin aıtqan.
Mektepke deıingi balalar mekemeleriniń, arnaıy áleýmettik qyzmetter kórsetetin jartylaı stasıonarlyq túrdegi uıymdardyń jumys isteýine tyıym salyndy.
Qoǵamdyq kólik antıseptıkalyq quraldarmen qamtamasyz etilip, onda tek jeke qorǵanysh quraldarymen (medısınalyq maskalar) júrýge ruqsat etildi. Qoǵamdyq kólik barlyq sanıtarlyq-epıdemıologııalyq normalardy saqtaı otyryp, saǵat 06.00-den saǵat 19.00-ge deıin shekteý rejımi aıasynda jumys isteıtin bolady.
Sanıtarlyq dárigerdiń qaýlysyna sáıkes, Oral qalasy men aýdandardaǵy barlyq aýmaqtyq memlekettik organdar men vedomstvolyq baǵynysty uıymdar, zańdy tulǵalary (menshik nysanyna qaramastan) jumys kúnin 2 saǵatqa qysqartady. Sondaı-aq óz qyzmetkerleri men klıentteriniń qaýipsizdigin qamtamasyz etip, qyzmetkerlerge qolǵaptar men bir rettik maskalar taratýy, orynjaıdy kúnine keminde 2 ret ylǵaldy jınaý jáne dezınfeksııalaýy, dúkenderge, dárihanalarǵa, medısınalyq mekemeler men basqa da uıymdarǵa kiretin jáne shyǵatyn jerlerde sanıtaızerler ornatýy tıis.
Orynjaı ishinde adamdar sanyn shektelip, 20 sharshy metr jerde 1 adamnan aspaýy tıis. Ǵımarat ishinde jáne syrtta adamdardyń arasy keminde 2 metr bolýy kerek. Orynjaılarǵa jeke qorǵanysh quraldarynsyz (medısınalyq maskasyz) kirýge tyıym salynady.
Karantınniń uzaqtyǵy COVID-19 vırýsynyń ınkýbasııalyq kezeńine qaraı sońǵy naýqasty oqshaýlaý jáne juqtyrý oshaǵynda dezınfeksııalyq sharalardy aıaqtaý sátinen bastap belgilenedi. Vırýstyń ınkýbasııalyq kezeńi 14 kún. Iаǵnı, Batys Qazaqstan oblysyndaǵy kúsheıtilgen karantın rejımi sońǵy naýqas oqshaýlanǵan soń eki aptadan keıin aıaqtalmaq.
Batys Qazaqstan