Áıgili Goal portaly álemniń ár qıyryndaǵy jasyl alańdarda jasyndaı jarqyrap júrgen jas fýtbolshylar arasyndaǵy úzdik ondyqty anyqtady.
Úzdikter kóshin Madrıdiń «Realynyń» shabýylshysy Rodrıgo Goes bastap tur. Koroldik klýb 19 jastaǵy brazılııalyq jas daryndy byltyr «Santostan» 45 mıllıon evroǵa satyp alǵan bolatyn. 2019 jyldyń 25 qyrkúıeginde «Osasýnaǵa» qarsy ótken oıynnyń 71 mınýtynda Vınısıýs Jýnıordy almastyrǵan ol alańǵa shyqqan bette dopty torda týlatyp, birden mılıondaǵan kórermenniń kózaıymyna aınaldy. Osylaısha, Rodrıgo HHI ǵasyrda týǵan «Realdyń» oıynshylary arasynan alǵashqy bolyp gol soqty. Al sol jyldyń 6 qarashasynda Chempıondar lıgasyndaǵy Ystambuldyń «Galatasaraıymen» ótken kezdesýde Brazılııanyń jas óreni het-trık avtory atandy. Búgingi tańda aıtýly fýtbolshy Ispanııanyń Premer-lıgasynda óreli ónerimen kózge túsip qana qoımaı, óz eliniń ulttyq qurama komandasy sapynda da ózin jaqsy qyrynan kórsetýde.
Sonymen qatar, «TOP-10» jas oıynshynyń qataryna Ansý Fatı («Barselona»), Meıson Grınvýd («Manchester Iýnaıted»), Reıner («Real Madrıd»), Edýardo Kamavınga («Renn»), Gabrıel Martınellı («Arsenal»), Lı Kan In («Valensııa»), Muhammed Ihattaren (PSV), Takefýse Kýbo («Real Madrıd») jáne Raıan Gravenberh («Aıaks») syndy saıypqyrandar endi.