Reseıdiń «Sport-Ekspress» basylymy koronavırýsqa shaldyqqan jáne sol dertten tolyqtaı aıyqqan fýtbolshylar men bapkerlerdiń tizimin jarııalady.
Koronavırýsty juqtyrǵandardyń deni Italııanyń A serııasynda óner kórsetip júrgen oıynshylar. Solardyń arasynda Danıele Rýganı, Blez Matıýıdı («Iýventýs»), Manolo Gabbıadını, Albın Ekdal, Omar Kollı, Marten Torsbı, Antonıo la Gýmına, Fabıo Depaolı, Bartosh Bereshınskı, Edgar Beretto («Sampdorııa»), Martıa Dzakkanı (Verona), Dýshan Vlahovıch, Herman Pesselıa, Patrık Kýtrone (Fıorentına), Danıel Maldını (Mılan) jáne Sarko Sportello (Atalanta) syndy saıypqyrandar bar.
Ispanııa chempıonatyndaǵy aıaq dop sheberleri arasynda Esekıel Garaı, men Elıakım Mangala bastaǵan «Valensııanyń» 10 oıynshysy bar. «Espanoldiń» eki fýtbolshysy qaterli dert juqtyrǵan. Olar – Leandro Kabrera men Ý Leı. Germanııa býndeslıgasynyń da qos óreni dál sondaı dýshar bolyp otyr. Olar – Lýka Kılıan («Pardebor») men Maksımılıan Mıttelshtadt («Gerta»). Sondaı-aq, Anglııa, Fransııa, Qytaı jáne basqa da birqatar memleketterdiń ishki birinshilikterinde óner kórsetip júrgen jigitter naýqastanǵan.
Koronavırýs juqtyrǵandar qatarynda áıgili bapker Fatıh Terım de bar. Kezinde Túrkııa ulttyq quramasy men Ystambuldyń «Galatasaraı» klýbyn órge súırep, zor tabystarǵa qol jetkizgen 66 jastaǵy aqsaqal Allanyń qalaýy jáne dárigerlerdiń kómegimen osy dertten aıyǵypty. Sol sekildi «Iýventýstyń» shabýylshysy Paýlo Dıbala, «Arsenaldyń» bas bapkeri Mıkel Arteta, «Aston Vıllanyń» oıynshysy Pepe Reına bastaǵan birneshe teńbil dop sheberleri de qazir din aman.