Almaty oblysy aýmaǵynda áleýmettik mańyzdy taýar baǵasyn turaqtandyrý men azyq-túlik qaýipsizdigi máselesi kún tártibinen túspeıdi. Bul týraly oblys ákimi Amandyq Batalovtyń tóraǵalyǵymen ótken selektorlyq jıynda talqylandy.
Búginde oblystyń turaqtandyrý qorynda 2226 tonna túrli azyq-túlik taýary bar. Bul qor aýdan, qala ákimderiniń tapsyrmasyna sáıkes daıyndalǵan. Onyń 912 tonnasy qazirgi kezde jergilikti jerlerge jetkizilgen. Bul óz kezeginde oblystyń óńirlerinde áleýmettik mańyzdy taýarlaryndyń baǵasyn tómendetýge múmkindik berdi. Jalpy, óńirde ákimdik tarapynan atqarylǵan sharalar nátıjesinde baǵany turaqtandyrýda oń qozǵalys baıqalyp otyr. Degenmen júrgizilgen taldaý qorytyndylary áleýmettik mańyzdaǵy azyq-túlikterdiń keıbir túrleri Eskeldi, Panfılov, Uıǵyr aýdandarynda áli de joǵary ekenin kórsetken.
Aıtpaqshy, qazirgi ólshem boıynsha áleýmettik mańyzdy azyq-túliktiń tizimine 19 túrli taýar kiredi eken. Osy taýardyń 17 túri Almaty oblysynda óndiriledi. Endigi maqsat ónim baǵasyn qalypty deńgeıde ustap turý. Bul baǵytta «Jetisý» áleýmettik korporasııasy jumys júrgizýde. Korporasııa oblystaǵy iri saýda núktelerimen jáne aýyl sharýashylyǵy taýar óndirýshilerimen kelisimshart jasasyp, sonyń negizinde kásipkerler bank kepildigine aınalym qarajatyn alyp otyr. Esesine kásipkerler halyqty áleýmettik mańyzdy azyq-túlik taýarlarymen qamtyp, baǵany yryqtandyryp ustap turýǵa tıis. Kelisimshart buzylǵan jaǵdaıda saýda núkteleri de, aýyl sharýashylyǵy taýar óndirýshileri de salynǵan qarjyny qaıtarýlary tıis. Muny qarjylaı qoldaý úshin oblys bıýdjetinen 1 mlrd teńge bólingen. Al oblys ákimi Amandyq Batalov qajet bolǵan jaǵdaıda qosymsha taǵy 1 mlrd teńge bólý kerektigin aıtady.
- Almaty oblysy – agrarly óńir. Sondyqtan, biz oblysty barlyq qajetti azyqpen qamtamasyz etip, qosymsha qor jınaqtaýdy nazarda ustaımyz. Iаǵnı burynǵydan da kóp jumys isteýge tıispiz. Máselen, kóktemgi dala jumystarynyń barlyǵy óz merziminde júrgizilip, bosańsýǵa jol berilmeýi kerek. Ol úshin bizde barlyq jaǵdaı bar, qajetti kómek kórsetilip keledi. Qant zaýyttaryn 600 myń tonnadaı qyzylshamen qamtamasyz etýimiz kerek. Al júgeriniń alqabyn 82 myń gektarǵa jetkizemiz. Zamanǵa saı agrotehnologııany qoldana otyryp, ónimdilikti arttyrýǵa tıispiz, - deıdi oblys ákimi Amandyq Batalov.