Atyraý munaı óńdeý zaýytynda sanıtarlyq rejım kúsheıtilip, zaýyttyń ákimshilik-turmystyq ǵımarattary men aýmaǵynda dezınfeksııalyq jumystar júrgizilýde.
«Koronavırýs ınfeksııasynyń aldyn alý maqsatynda AMО́Z-de sanıtarlyq rejım kúsheıtilip, zaýyt aýmaǵy men ákimshilik-turmystyq ǵımarattardy zalalsyzdandyrý jumystary júrgizilýde. Bul úshin 5 elektr apparatty, 40 kg-ǵa jýyq hımııalyq reagentter, arnaıy kıimniń 80 dana jıyntyǵy men betperdeler satyp alyndy. Zaýytqa klınıngtik qyzmet kórsetetin merdigerlik uıymdar – «AIZA-Servıs» jáne «Gazstroıproekt JShS-teriniń qyzmetkerlerinen 5 brıgada quryldy. Zalalasyzdandyrýshylarǵa zaýyt aýmaǵynda júrip-turý úshin arnaıy kólik bólindi. Sonymen qatar, barlyq ǵımarattar men bólmelerde, adamdar kóp shoǵyrlanatyn oryndarda dezınfeksııalyq quraldardy paıdalanyp, ylǵaldy tazalyq jumystaryn júrgizý jıiledi» -dep habarlady kásiporynnyń baspasóz qyzmeti.
Sondaı-aq zaýytqa eki kire beriste aýysym personalynyń dene temperatýrasyn kúndelikti ólsheý maqsatynda teplovızorlar ornatylyp, 20 dıstansııalyq qyzý ólshegishter satyp alyndy. Sanıtarlyq toraptar, tamaqtaný bólmeleri, operatorlar bólmesi jáne únemi adamdar jınalatyn basqa da oryndar antıseptıkalyq quraldary bar dozatorlarmen qamtamasyz etildi.
Qazir kásiporynda jumysshylary úshin satyp alynǵan 36 000 medısınalyq maska, «3M» markaly 20 000 respırator, 780 lıtr antıseptıkalyq quraldardyń 127 danasy, 50 ml jeke antıseptıkalyq gelderdiń 500 danasy bar. Búginge deıin óndiristik emes sektor qyzmetkerleriniń 86% qashyqtan jumys isteýge kóshirildi.
Jumasat ǴAZIZ