Senattyń Konstıtýsııalyq zańnama, sot júıesi jáne quqyq qorǵaý organdary komıtetinde senator Vladımır Volkovtyń tóraǵalyq etýimen «2012 jylǵy 11 mamyrdaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qazaqstan Respýblıkasy azamattarynyń Qyrǵyz Respýblıkasynyń aýmaǵynda jáne Qyrǵyz Respýblıkasy azamattarynyń Qazaqstan Respýblıkasynyń aýmaǵynda bolý tártibi týraly kelisimge ózgerister engizý týraly hattamany ratıfıkasııalaý týraly» zań jobasy qaraldy, dep habarlady Senattyń baspasóz qyzmeti.
Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy yntymaqtastyqtyń quqyqtyq negizderin jasaý zań jobasynyń negizgi mindeti bolyp tabylady.
Keńeıtilgen otyrysta komıtet múshesi Sáýle Aıtpaeva baıandama jasap, zań jobasyn ratıfıkasııalaýdyń mańyzdylyǵyna toqtaldy. «Hattamada kóshi-qon salasyndaǵy ulttyq zańnamany úılestirý jáne jol júrý qujattaryn birizdendirý maqsatynda taraptardyń azamattyǵyna tıesiligin kórsete otyryp, qosymsha beti bar (fotosýreti bar) 16 jasqa tolmaǵan balalar úshin týý týraly kýálikti taraptardyń memlekettik shekarasynyń jolyn kesý úshin qujattar tizbesinen alyp tastaý kózdeledi», - dedi ol. Onyń aıtýynsha, hattamany ratıfıkasııalaýdyń nátıjesinde balalardyń qujaty men jeke basyn úılestire otyryp, kirý jáne shyǵý tártibi halyqaralyq standarttarǵa sáıkestenedi, sondaı-aq kóshi-qon máselelerinde eki el yntymaqtastyǵynyń tıimdiligi arta túsedi.
Depýtattar keńeıtilgen otyrysta zań jobasyn Senattyń jalpy otyrysynda qaraýdy uıǵardy.