Bul týraly búgin QRKF tóraǵasynyń mindetin atqarýshy Satybaldy Dáýletalın óziniń Feısbýk áleýmettik jelisindegi paraqshasynda habarlady.
El basyna kún týǵan syn saǵatta ortaq isten Kásipodaqtar federasııasy syrt qala almaıdy. Naýryzdyń 31-i men sáýirdiń 6-sy aralyǵynda Federasııa «Eńbek adamdaryna raqmet» atty arnaıy chellendj uıymdastyryp, 16 aýmaqtyq kásipodaq birlestikteri qıyn-qystaý kezeńde halyqqa qaltqysyz qyzmet etip júrgen eńbek adamdaryna áleýmettik jelilerde rızashylyqtaryn bildirdi. Jaqsylyq jasaýdan jarysqan jandardyń eńbegin jarqyrata jaıyp salýdy maqsat etken chellendj barysynda elimizdiń ár óńirindegi talaı eńbek adamynyń attary atalyp, kópshilikke tanystyryldy.
«Bul kúnderi biz ár qazaqstandyq úshin kúndelikti densaýlyǵyna qater tóndire otyryp, qyzmet etip júrgenderdiń eleýli eńbegin aıttyq, kórsettik. Qymbatty bizdiń medısına qyzmetkerleri, júrgizýshiler, polısııa qyzmetkerleri, jýrnalıster, satýshylar, energetıkter, áleýmettik qyzmetshiler, eriktiler, jetkizýshiler, aýla tazalaýshylar! sizderdiń árqaısylaryńyz bizdi qorǵaýdasyzdar. Búgingi jaǵdaıda sizderdiń atqaryp júrgen eńbekterińiz – erlik! Sizderge sheksiz taǵzym! О́zderińizdi saqtańyzdar! Biz Sizderdiń eńbekterińizge alǵys aıtamyz! Biz Sizderdi maqtan tutamyz!» dedi S.Dáýletalın.
Kásipodaq basshysy sonymen qatar, barsha qazaqstandyqtardy tótenshe jaǵdaı kezeńinde basyn qaýip-qaterge tigip, el ıgiligi jolynda tynymsyz eńbek etip júrgen jandarǵa qoldaý kórsetýge ári ınfeksııany juqtyrý qaýpin azaıtý úshin saqtyq sharalaryn qatań ustanýǵa shaqyrdy.
«Úıde bolýlaryńyzdy suraımyn! Karantın sharttaryn saqtaıyq! Qatań tártip pen barlyq erejeler saqtalǵan jaǵdaıda ǵana COVID-19 qarsy kúreste jeńiske qol jetkize alamyz. Biz barsha qazaqstandyqtardyń birligi men yntymaqtastyǵynyń arqasynda osy qıyndyqty eńseretindigimizge senimdimiz»,-dedi QRKF tóraǵasynyń mindetin atqarýshy S.Dáýletalın.