Búgin, 10 sáýir kúni Batys Qazaqstan oblysynda COVID-19 ınfeksııasyn juqtyrǵan taǵy 2 adam tirkeldi. Olardyń ekeýi de halyqaralyq júk tasymalymen aınalysatyn kólik júrgizýshileri, О́zbekstan Respýblıkasynyń azamaty.
«Reseı Federasııasynyń Samara oblysymen shekaradaǵy «Syrym» avtoótkelindegi sanıtarlyq-karantındik bekette bizdiń epıdemıolog mamandar qashyqtyq termometrııa jáne saýalnama júrgizý kezinde azamattardyń birinen dene qyzýy kóterilgenin anyqtaǵan. Sóıtip, is-áreket algorıtmine saı olar oqshaýlanyp, jedel járdem kóligi shaqyryldy. Barlyq epıdemııaǵa qarsy is-sharalardy saqtaı otyryp, atalǵan azamattar provızorlyq stasıonarǵa jetkizilip, koronavırýs juqpasyna taldaý jasaldy. Dıagnostıkalyq zertteý nátıjesi boıynsha COVID-19 dıagnozy naqtylandy. Qazirgi ýaqytta oblystyq juqpaly aýrýlar aýrýhanasynda jeke bokstarǵa ornalastyryldy» delingen Memlekettik komıssııanyń shuǵyl shtaby taratqan málimdemede.
Qazir naýqastarmen qarym-qatynasta bolǵan adamdar anyqtalyp, barlyǵy medısınalyq baqylaýǵa alynǵan. Aýrý oshaqtarynda epıdzertteý jumystary, «Ulttyq saraptama ortalyǵy» oblystyq fılıaly dezınfeksııa ortalyǵy mamandary dezınfeksııalyq jumystar júrgizdi.
Aıta keteıik, keshe ǵana dál osy shekara beketinde dál osyndaı jaǵdaı bolyp, eki ózbek júrgizýshisi aýrýhanaǵa jatqyzylǵan bolatyn. Sonymen, Batys Qazaqstan oblysynda COVID-19 koronavırýs ınfeksııasyn juqtyrǵan adam sany 6-ǵa jetti. Olardyń bári oblystyq juqpaly aýrýlar aýrýhanasyna em alýda.
Batys Qazaqstan