Batys Qazaqstan oblysynda koronavırýs indetine shaldyqqandar sany 9-ǵa jetti. Buǵan deıin anyqtalǵan eki adam – Máskeýde vahtalyq jumysta bolyp, elge qaıtqan batysqazandyqtar bolsa, búgin tuńǵysh ret vırýsty Oral qalasynda juqtyrǵan naýqas tirkeldi.
- 49 jastaǵy naýqas provızorlyq stasıonarda medısınalyq qyzmetker bolyp jumys isteıdi. Qazirgi tańda naýqastyń jaǵdaıy qanaǵattanarlyq. Oblystyq juqpaly aýrýlar aýrýhanasyna jeke boksqa ornalastyryldy. Bekitilgen hattamaǵa sáıkes em qabyldap jatyr, - dedi Batys Qazaqstan oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaev.
Arnaýly qaýlyǵa sáıkes COVID-19 juqtyrý qaýpi joǵary medısınalyq qyzmetkerler turaqty tekserilip turady. Atalǵan qyzmetker de 9 sáýir kúni bolǵan tekseriste saý bolǵan. Alaıda 12 sáýir kúni ótkizilgen dıagnostıkalyq zertteý nátıjesi onyń boıynan COVID-19 dıagnozyn anyqtaǵan.
- Biz naýqaspen jaqyn qarym-qatynasta bolǵan 7 adamdy anyqtap, zerthanalyq zertteý júrgizdik. 6 adamnan vırýs tabylmady, jetinshisiniń zertteý nátıjesin kútip otyrmyz. Olardyń bári de birge qyzmet etetin áriptester. «Ulttyq saraptama ortalyǵy» fılıalynyń mamandarymen naýqastyń páterine, kireberisi men úıdiń irgeles aýmaǵyna qorytyndy dezınfeksııa júrgizildi. Naýqas páterde jalǵyz turǵan. Qazir úıdiń podezi karantınge jabyldy. Barlyq turǵyndardy jasalyp jatqan sharalarǵa túsinistikpen qarap, karantın rejımin qatań saqtaýdy suraımyz, - deıdi Muhamǵalı Qaıyrjanuly.
Batys Qazaqstan oblystyq Densaýlyq saqtaý basqarmasynyń basshysy Bolatbek Qaıýpovtyń aıtýynsha, koronavırýs dertine shaldyqqan naýqastarmen jaqyn jumys isteıtin dárigerler jeke qorǵanysh kıimderimen tolyq jabdyqtalǵan. Iаǵnı oraldyq dárigerdiń vırýs juqtyryp alýy óziniń saqtyq sharalaryn tolyq saqtamaýynan bolýy múmkin.
Aıta keteıik, 29 sáýirden beri Batys Qazaqstan oblysynda koronavırýs indetin juqtyrǵan 9 adam tirkeldi. 1 adam vırýsty Atyraý oblysynan, 7 adam Reseı Federasııasy aýmaǵynan juqtyryp kelgeni anyqtalǵan. Naýqastyń biri jazylyp, jaqynda úıine shyqty. Qalǵan 8 naýqas oblystyq juqpaly aýrýlar aýrýhanasynda qajetti em-domyn alyp jatyr.
Dárigerlerdiń aıtýynsha, olardyń barlyǵynyń da jaǵdaıy qanaǵattanarlyq.
Batys Qazaqstan