Bıylǵy sáýirde Qazaqstan energetıkasynyń kóshbasshysy – Ekibastuz GRES-1-ge týra 40 jyl toldy. 1980 jylǵy 15 sáýirde KSRO Energetıka jáne elektrlendirý mınıstrligi stansanyń alǵashqy týrbogeneratoryn jáne qazandyq agregatyn paıdalanýǵa qabyldaý týraly aktige qol qoıǵan bolatyn.
1-Ekibastuz Memlekettik Aýdandyq Elektr stansasy burynǵy KSRO-nyń Ýral men Batys Sibirdiń tutynýshylaryn elektrmen jabdyqtaý úshin, quramyndaǵy 5 elektr stansasynyń belgilengen qýattylyǵy 20000 MVt bolatyn Ekibastuz Otyn-Energetıka Keshenin qurý jónindegi jobasynyń bir bóligi retinde qurylǵan bolatyn. Alaıda, tek eki elektr stansasynyń: EGRES-1 men EGRES-2-niń ǵana qurylysy aıaqtaldy.
Búginde «B.Nurjanov atyndaǵy Ekibastuz GRES-1» - Qazaqstandaǵy Birtutas elektr energetıkasy júıesiniń qajettilikterin qanaǵattandyryp otyrǵan iri jylý elektr stansasy. Ulttyq mańyzy bar stansalar qataryna jatatyn elektr stansasy respýblıkadaǵy elektr tutyný kóleminiń 20% tolyqtaı qamtamasyz etý múmkindigine ıe. Stansaǵa 100%-tik qatysý úlesimen otandyq asa iri elektr energetıkalyq holdıng – «Samuryq-Energo» AQ ıelik etedi.
Kondensatty elektr stansasynyń belgilengen qýattylyǵy 4000 MVt, árqaısysynyń qýattylyǵy 500 MVt bolatyn segiz energııa blogimen jabdyqtalǵan. Onyń alǵashqy energııa blogi 1980 jyly paıdalanýǵa berildi, sońǵy segizinshi energııa blogi 1984 jyly iske qosyldy.
Energetık-mamandardyń sózinshe, Ekibastuz GRES-1 qurylǵan kezde sol ýaqyt úshin progressıvti birqatar tehnıkalyq jáne sharýashylyq sıpattaǵy sheshimder iske asyrylǵan, máselen: elektr stansasy otyn óndiriletin jerge neǵurlym jaqyndatyldy, salqyndatqysh sý qoımasy men kúl úıindisi kurǵap qalǵan, sharýashylyq maqsatynda paıdalanylmaıtyn kólderdiń tabıǵı oıpańdarynda jaıǵastyryldy, qajetti sý Ertis-Qaraǵandy kanalynan alyndy, stansany ornalastyrýda Ekibastuz qalasyna qaraı soǵatyn jeldiń baǵyty da eskerildi.
1981 jylǵy qazan aıynda GRES-1 alǵashqy mıllıard kılovatt saǵat elektr energııasyn óndirdi. Keńestik kezeńde GRES-1 KSRO aýmaǵyndaǵy asa iri jylý elektr stansalarynyń qataryna endi.
Ekibastuz GRES-1 elektr stansasyndaǵy sýdy hımııalyq tazartý (SHT) júıesin qaıta qurý jobasyn alǵashqylardyń biri bolyp iske asyrdy. SHT júıesin qaıta qurý barysynda stansa sý jańa membrandyq tehnologııalarǵa kóshti, bul tuzsyzdandyrylǵan sýdy hımııalyq daıyndaý júıesiniń senimdi jumys isteýin edáýir arttyryp qana qoımaı, operasııalyq shyǵystardy da azaıtýǵa múmkindik berdi. Tazartylǵan sýdyń sapasy da jaqsardy – qaıazdyǵy men elektr ótkizgishtigi azaıdy.
«B. Nurjanov atyndaǵy Ekibastuz GRES-1» JShS 2019 jyldy 18,3 mlrd kVtsaǵ elektr energııasyn óndirip aıaqtady. Tutas alǵanda, Qazaqstan naryǵynda EGRES-1 óndirgen elektr energııasynyń úlesi 14,2%-ke artty.
Ortasha bloktik júktemesi 455 megavatty quraıtyn jeti energııa blogi jumys istep turǵan kezde, stansa kúzgi-qysqy maýsymǵa tolyq daıyn ekenin kórsetti.
2020 jylǵy aqpanda 7 energııa bloginiń jumysy úshin rekordtyq júkteme – 3481 MVt tirkeldi. Mundaı kórsetkish sońǵy ret 1986 jylǵy aqpanda baıqalǵan bolatyn. Eń joǵarǵy núkte ol kezde 3095 MVt-qa jetti, alaıda 8 energııa blogi jumys istep turdy.
Búgingi tańda stansa 1400-den astam adamdy jumyspen qamtamasyz etip otyr. О́ndiris qýattylyǵyn arttyrýmen qatar, EGRES-1 Ekibastuz qalasynyń áleýmettik jobalaryna demeýshilik kómek kórsetip, qoǵamdyq qaıyrymdylyq qorlaryna, mádenı-buqaralyq is-sharalarǵa qoldaý bildirip, óńirdiń áleýmettik tynys-tirshiligine belsene qatysady.