Memleket basshysy Qasym-Jomart Toqaev aıqyndaǵan daǵdarysqa qarsy sharalarǵa Qazaqstan máslıhattary tolyqtaı qoldaý bildirýde. Qazaqstan máslıhattarynyń depýtattary búgingi kúnge deıin jeke qarjysynan 185,9 mln teńge shamasynda materıaldyq kómek kórsetti. Bul týraly Senattyń baspasóz qyzmeti habarlady.
Elbasynyń bastamasymen qurylǵan «Biz birgemiz» qaıyrymdylyq qory aıasynda Atyraý oblystyq máslıhatynyń depýtattary 28,4 mln teńge, Aqmola oblystyq máslıhaty 25 mln teńge, Aqtóbe oblystyq máslıhaty 14 mln teńge, Almaty qalasy 9,6 mln teńge, Qostanaı oblystyq máslıhaty 7 mln teńge, Shyǵys Qazaqstan oblystyq máslıhaty 2 mln teńge, Qyzylorda oblystyq máslıhaty 1,7 mln, Almaty oblystyq máslıhaty 2,7 mln teńge somasynda birinshi kezekte qajet bolatyn azyq-túlik usyndy.
Depýtattar odan basqa ózderiniń saılaý okrýgteriniń aıasynda jeke ózderiniń jáne demeýshilik qarjysyna kómek kórsetýdi uıymdastyrdy, bul rette bıýdjettiń nemese ákimdikterdiń qarjysy tartylǵan joq.
Atap aıtqanda, Aqmola oblystyq máslıhatynyń depýtattary jáne oblystyń qalalary men aýdandarynyń depýtattary blokpostardy materıaldyq-tehnıkalyq jaraqtandyrýǵa, ystyq tamaq, jeke qorǵanys quraldaryn berýge kómek kórsetti.
Aqtóbe oblystyq máslıhatynyń depýtattary áleýmettik mańyzy bar azyq-túliktiń baǵasyn turaqtandyrý úshin, sonymen qatar noýtbýktar satyp alý jáne halyqtyń áleýmettik osal toptarynyń balalaryn qashyqtan oqytýdy uıymdastyrý úshin oblystyq bıýdjetten qarjy bóldi.
Almaty oblystyq máslıhatynyń depýtattary az qamtamasyz etilgen, kóp balaly otbasylaryna, múmkindigi shekteýli adamdarǵa jáne zeınetkerlerge kómek berýge oraı qaıyrymdylyq isterin belsendi júzege asyrdy.
Atyraý oblysynda depýtattar azyq-túlik pen dári-dármekterdiń baǵasyna monıtorıng júrgizýde. Sonymen qatar, «Biz birgemiz» aksııasy aıasynda az qamtylǵan jáne kóp balaly otbasylar úshin azyq-túlik jıyntyǵy, medısınalyq maskalar jáne antıseptıkter satyp alyndy.
Jambyl oblysynda máslıhat depýtattary muqtaj jandarǵa, egde adamdar men múgedekterge jeke qorǵanys quraldaryn, azyq-túlik jáne birinshi kezekte qajetti taýarlardy, sondaı-aq karantın kezinde óz úılerin tastap ketýge múmkindigi joq turǵyndarǵa azyq-túlik sebetterin berdi.
Shyǵys Qazaqstan oblysynda depýtattar qoǵamdyq kólikti, adamdar kóp jınalatyn nysandardy (tamaqtaný, saýda oryndary, avto jáne temirjol vokzaldary) dezınfeksııalaýdy baqylady, áleýmettik mańyzy bar ónimder men taýarlardyń baǵasyna monıtorıng júrgizedi.
Batys Qazaqstan oblysynyń máslıhat depýtattary azyq-túlik sebetterin, oqýshylarǵa arnalǵan keńse taýarlaryn, dári-dármekterdi, medısınalyq maskalardy, antıseptıkterdi satyp aldy. Qalalyq máslıhat depýtattary oblystyq kardıologııa ortalyǵyna medısınalyq apparat pen qan quıý júıesin satyp aldy.
Qyzylorda oblysynda oblystyq máslıhat depýtattary "Biz birgemiz" respýblıkalyq aksııasyna qatysty. Olar muqtaj otbasylarǵa kómek kórsetip, az qamtylǵan otbasylar úshin azyq-túlik jıyntyǵyn, kompıýter satyp alýǵa qarjy bóldi.
Mańǵystaý oblysynda depýtattar azyq-túlik, benzın baǵasyna monıtorıng júrgizdi, "Biz birgemiz" aksııasy aıasynda muqtaj otbasylar azyq-túlikpen qamtamasyz etildi, tigin sheberhanalaryna medısınalyq maskalardy tigý úshin materıaldar satyp alyndy.
Qaraǵandy oblystyq máslıhatynyń depýtattary "Biz birgemiz" respýblıkalyq aksııasyna qatysty. Olar karantın kezinde qart adamdarǵa, az qamtylǵan jáne kóp balaly otbasylarǵa birinshi kezekte qajetti azyq-túlik jiberdi, qart adamdarǵa maskalar men bir rettik qolǵaptar, sondaı-aq múgedek balalar men olardyń otbasylaryna ystyq tamaq satyp alyndy.
Qostanaı oblysynda kóp balaly jáne az qamtamasyz etilgen otbasylarǵa kómek kórsetilýde, zeınetkerlerge maskalar taratylyp, oqýshylardy qashyqtan oqytý jáne oqýshylarǵa maskalar satyp alý uıymdastyryldy, qashyqtan oqytý úshin áleýmettik jaǵynan osal otbasylardyń balalary smartfondarmen, noýtbýktarmen qamtamasyz etildi.
Nur-Sultan qalalyq máslıhat depýtattary qalanyń shalǵaı aýdandarynda turatyn qart adamdarǵa dári-dármekterdi jetkizý úshin kásiporyndar men emhanalarǵa avtokólik jiberdi. Az qamtylǵan otbasynan shyqqan oqýshylar derbes kompıýterlermen qamtamasyz etildi. Birqatar depýtattar táýlik boıy jumys ornyndaǵy medısına qyzmetkerleriniń otbasylaryna azyq-túlik jıyntyǵy túrinde kómek kórsetti.
Almaty qalasy máslıhatynyń depýtattary "Jańa Alataý" qoǵamdyq qorynyń shotyna jeke qarjysynan qaıyrymdylyq kómek aýdardy, sonymen qatar, "Biz birgemiz" aksııasy aıasynda az qamtylǵan otbasylar úshin birinshi kezekte qajetti taýarlar men jeke qorǵanys quraldaryn satyp aldy.
Pavlodar oblysynda depýtattar medısınalyq maska tigýdi uıymdastyrdy, turǵyndarǵa birinshi kezekte qajetti azyq-túlik qoryn qurdy, muqtaj otbasylardyń balalaryn onlaın oqytý resýrstarymen qamtamasyz etý máselesin sheshýge kómek kórsetti.
Soltústik Qazaqstan oblysynda máslıhat depýtattary az qamtamasyz etilgen otbasylarǵa azyq-túlik toptamasyn taratty, úı-jaılardy, kóshelerdi dezınfeksııalaý úshin tehnıka jáne antıseptıkalyq quraldar bólindi, aýyldarda zeınetkerlerge zeınetaqy men áleýmettik járdemaqy jetkizý uıymdastyryldy, muqtaj otbasylarǵa otyn men kómir jetkizildi,
Túrkistan oblystyq máslıhatynyń depýtattary qarajat bólip, az qamtamasyz etilgen otbasylarǵa azyq-túlik sebetin jáne jeke gıgıena quraldaryn satyp aldy.
Shymkent qalasynda qalalyq máslıhat depýtattary "Biz birgemiz" aksııasy aıasynda qarjy jınap, muqtaj otbasylarǵa azyq-túlik, medısınalyq maskalar, antıseptıkter berip kómektesti.