Túrkistan oblysynda koronavırýs ınfeksııasyn juqtyrǵan azamattar sany Jetisaı aýdanynda kóp. Qazirgi tańda tirkelgeni - 18, onyń ishinde 56 jastaǵy turǵyn qaıtys bolǵan.
Sol sebepti de Jetisaı aýdanynda saqtyq sharalary kúsheıtilgen. Adam kóp shoǵyrlatatyn bank bólimsheleri men «Qazposhta» mekemesindegi uzyn-sonar kezekter saqtyq sharalarynyń talaptaryna saı retke keltirilgen. Iаǵnı kezekte turǵan azamattardyń araqashyqtyǵy saqtalyp, klıentterdiń aty-jónderi men kezektik reti daýy sulǵaıtqyshpen habarlanýda. Dál osyndaı saqtyq sharalary aýdannyń ózge kent, aýyl okrýgterinde de qolǵa alynýda.
Degenmen óńirde tótenshe jaǵdaı kezinde tártipke baǵynbaǵan, zańǵa qaıshy óreskel áreket jasaýshylar tyıylmaı tur. Tótenshe jaǵdaı rejımin buzý boıynsha oblysta 123 jaıt anyqtalyp, 43 turǵyn qamaýǵa alynǵan. Oblystyq Polısııa departamenti baspasóz qyzmetiniń málimetinshe, sottyń sheshimimen 63 turǵynǵa ákimshilik aıyppul salynǵan. Taǵy bir azamatqa eskertý berilip, 16 turǵynnyń isi sotta qaralýda. Sondaı-aq departament quqyqbuzýshylyq jasaǵan azamattardyń arasynda tótenshe jaǵdaıdyń alǵashqy kezderinde toı, týǵan kún, betashar, tusaýkeser jasaǵandar, oıyn-saýyq oryndaryn ashyp, adamdardy qabyldaǵany úshin jaýapqa tartylǵandar da baryn jarııa etti. Shektelgen ýaqytta adamdar toby bolyp shoǵyrlanǵany úshin eskertý alǵandar da bar. Al Maqtaaral aýdany Atakent kentindegi blok-bekette qyzmette turǵan polıseıge qarsylyq bildirgen turǵyn qamaýǵa alynǵan.
Tártip saqshylarynyń kúsheıtilgen rejımdejumys atqarýy óz nátıjesin de berýde. Mysaly, ótken jyldyń 3 aıymen salystyrǵanda bıyl qylmystar sany 18,2 %-ǵa azaıǵan. Qoǵamdyq orynda jasalǵan quqyqbuzýshylyqtar 25,7 paıyzǵa, kóshelerde jasalatyn qylmystar 26,2 paıyzǵa tómendegen.