#BizBirgemiz aksııasy aıasynda, Nur Otan partııasy ókilderiniń uıytqy bolýymen, Saıram aýdanyndaǵy «AYKAN» JShS-y mıllıon teńgege jergilikti 115 otbasyǵa azyq-túlik pen ózderi óndiretin irimshik, sút ónimderin taratty.
«Emır» saýda belgisimen sút ónimderin óńdeý isin jaqsy jolǵa qoıǵan seriktestik dırektory Almagúl Aıqan qıyn sátte muqtaj jandarǵa qol ushyn sozý azamattyq boryshym dep sanaıdy. Búgingi tańda «AYKAN» kompanııasy tek oblys emes elimiz boıynsha sút ónimderin óńdeıtin iri kásiporynǵa aınalǵan. Kúnine 100 tonna sútti óńdeı alatyn kompanııanyń basty ereksheligi – ónimderdiń saqtalý merzimin uzartý úshin turaqtandyrǵyshtardy qoldanbaıdy. Barlyq ónim tabıǵı túrinde satylady. Al shıkizat kózi bolyp tabylatyn sút Saıram jáne Tóle bı aýdandarynan satyp ákelinedi. Seriktestik «qarapaıym zattar ekonomıkasy» baǵdarlamasy aıasynda qurǵaq sút pen sarysý óndiretin jobany júzege asyrýdy josparlaýda.
Aksııa aıasyndaǵy qaıyrymdylyq sharalarynda Jetisaı aýdanynyń kásipkerleri de belsendilik tanytýda. Mysaly, Qazybek bı aýyldyq okrýgine qarasty Á. Ospanov aýylynyń týmasy karantın mezgilinde qıyndyqqa tap bolǵan jerlesterine 200 qap un taratyp berdi. Jalpy Jetisaı aýdanynda qazirgi tańǵa deıin demeýshiler esebinen az qamtylǵan otbasylarǵa 10 mıllıonnan astam qarjynyń kómegi kórsetilgen.