Batys Qazaqstan oblysynda 17 sáýir kúni tańerteń koronavırýs indetin juqtyrǵandardyń sany 30-ǵa jetip, ekinshi adam jazylyp shyqty.
17 sáýirdiń tańynda Batys Qazaqstan oblysynda «COVID-19» ınfeksııasyn jańadan juqtyrǵan 5 oqıǵa tirkeldi.
- Olardyń bireýi – Oral qalasynyń 30 jastaǵy turǵyny. Ol koronavırýstyq ınfeksııa juqtyrǵan adammen qarym-qatynasta bolǵan. Taǵy 4 azamat Reseı Federasııasynda vahta ádisimen jumys jasap kelgen Batys Qazaqstan oblysynyń turǵyndary, - dedi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev.
Vahtalyq jumysshylar Reseı Federasııasynyń Saratov oblysymen shekarasyndaǵy «Tasqala» avtoótkelinde sanıtarlyq-karantındik beketten ótken kezinde eshqandaı aýrý belgisin sezinbegen. Biraq epıdemıolog mamandar qashyqtan termometrııa jasap, saýalnama júrgizip, zerthanalyq tekserý úshin karantındik stasıonarǵa jiberdi. Sol jerde dıagnostıkalyq zertteý qorytyndysy olardyń boıynda qaýipti ınfeksııa bar ekenin naqtylady.
«Qazirgi tańda naýqastardyń jaǵdaılary qanaǵattanarlyq. Barlyǵy oblystyq juqpaly aýrýlar aýrýhanasyna ornalastyryldy. Naýqaspen qarym-qatynasta bolǵan adamdar anyqtalyp, barlyǵy medısınalyq baqylaýǵa alynýda. Aýrý oshaqtarynda epıdzertteý, dezınfeksııa jumystary júrgizilýde» delingen Batys Qazaqstan oblysy komıssııasynyń shuǵyl shtaby taratqan málimdemede.
Qazirgi sátte Batys Qazaqstan Oblystyq juqpaly aýrýlar aýrýhanasynda – 28 adam, provızorlyq stasıonarda – 50, karantındik stasıonarda – 158, úı oqshaýlaýynda – 1396 adam dáriger baqylaýynda.
Batys Qazaqstan