Batys Qazaqstan oblysynda 17 sáýir kúni koronavırýs indetin juqtyrǵandardyń sany 32-ge jetti. Sońǵy anyqtalǵan eki adamnyń biri – Aqtóbe oblysynyń turǵyny.
«Batys Qazaqstan oblysynda koronavırýs ınfeksııasyn juqtyrǵan taǵy 2 adam anyqtaldy. Naýqastyń biri - 22 jasta, Batys Qazaqstan oblysynyń turǵyny, al ekinshisi – Aqtóbe oblysynyń turǵyny, 23 jasta» dep habarlady Batys Qazaqstan oblysy komıssııasynyń shuǵyl shtaby.
Eki naýqas ta Reseı Federasııasynda vahtalyq ádispen jumys jasaıtyn azamatpen birge kórshi elden kelgen. Vahtalyq jumysshynyń aýyrǵany shekaradan ótkende belgili bolǵan edi. Al bul azamattar naýqaspen baılanysta bolǵan tulǵa retinde karantındik stasıonarǵa oqshaýlanǵan bolatyn. Sońǵy dıagnostıkalyq zertteý qorytyndysy ekeýine de «COVID-19» dıagnozyn qoıdy.
Qazir naýqastar oblystyq juqpaly aýrýlar aýrýhanasyna jatqyzyldy. Aýrý oshaqtarynda dezınfeksııalyq jumystar júrgizildi. Epıdemııaǵa qarsy is-sharalar jalǵasýda.
Sonymen, Batys Qazaqstan oblysynda koronavırýstyq juqpadan 2 adam jazylyp shyqty, 30 adam oblystyq juqpaly aýrýlar aýrýhanasynda em alyp jatyr. Sondaı-aq provızorlyq stasıonarda – 148, karantındik stasıonarda – 81, úı jaǵdaıynda – 1396 adam oqshýalanyp, dáriger baqylaýyna alynǵan.
Batys Qazaqstan