Túrkistan oblysynda Abaı Qunanbaevtyń 175 jyldyǵyna arnalǵan óleń, qara sózderdiń maǵynasyn erekshe jáne aýqymdy taldaý boıynsha «Abaı oqýlary» óner baıqaýy ótpek.
Sondaı-aq Shámshi Qaldaıaqovtyń týǵanyna 90 jyl tolýyna oraı jarııalanǵan «Tolqysyn shartarap» respýblıkalyq óner baıqaýyna elimizdiń 14 pen 29 jasqa deıingi kompozıtor, aqyn, ánshiler top qurý arqyly qatysa alady. Úzdik oryndalǵan 15 vıdeo iriktelip, tamyz aıynda kompozıtordyń mereıtoı keshine qatysýǵa joldama alady.
Budan bólek Qazaqstannyń eńbek sińirgen qaıratkeri, «Alash» halyqaralyq syılyǵynyń laýreaty, jazýshy Marhabat Baıǵuttyń 75 jyldyq mereıtoıyna qarsy «Marhabat shyńy» respýblıkalyq jas qalamgerlerdiń shyǵarmashylyq baıqaýy jarııalandy. Atalmysh baıqaý 25 mamyrda qorytyndylanady. Al aıtys óneriniń aqtańgeri Áselhan Qalybekovanyń 70 jyldyq mereıtoıyna oraı oblystyq jastar arasynda ótetin «Áselhan oqýlary» kórkem sóz beınejazba baıqaýyna ótinimder 20 sáýirge deıin qabyldanady. Qazylar alqasy «watsapp» jelisi arqyly jeke chatta aqyldasý kezeńin ótkizip, 22 sáýir kúni saǵat 16:00-de otyrar_jastary paraqshasynda tikeleı efırde jeńimpazdardy anyqtaıdy.
Árıne barlyq baıqaýlar onlaın rejımde ótkiziledi. Bul oraıda tájirıbe de joq emes. Jýyrda «Naýryz, Naýryz – kún ıgi» kórkemsóz oqý beıne-baıqaýy ótip, Túrkistan oblysy men Shymkent qalasynan 70-ke jýyq úmitker qatysqan bolatyn. Qatysýshylar shyǵarmalaryn áleýmettik jelige júktep, aqtyq márege joldama alǵan. Jastar jarysy jınaǵan lúpil sanymen qorytyndylandy. Nátıjesinde Báıdibek aýdany men Túrkistan qalasynyń jastary top jardy. Júldeli oryndardy Saryaǵash, Tólebı aýdandarynyń jastary ıelendi. Jeńimpazdarǵa oblystyq «Jastar resýrstyq ortalyǵynyń» basshysy Amalbek О́mirtaı onlaın quttyqtap,kádesyılar joldady.