Oblys ákimdiginiń baspasóz ortalyǵynda ótken brıfıngte energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov turǵyndardyń jekelegen sanatyna kommýnaldyq tólemderdi óteý úshin kómek beriletinin málimdedi. Naqtyraq aıtqanda, jergilikti ákimdikter tutynýshynyń derbes esep-shotyna 2 aı boıy 15 myń teńgeden aýdarady.
Kommýnaldyq kómek I, II jáne III toptaǵy múgedekterge, UOS qatysýshylary men múgedekterine, UOS qatysýshylary men múgedekterine teńestirilgen tulǵalarǵa, múgedek balalardy tárbıelep otyrǵan otbasylarǵa, kóp balaly otbasylarǵa, eń tómengi zeınetaqy alatyn zeınetkerlerge, memlekettik jáne qoǵamdyq mindetterin, áskerı qyzmetin oryndaý kezinde, ǵaryshqa ushýlardy daıarlaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan adamdardyń otbasylaryna, AÁK alatyn azamattarǵa, onyń ishinde jalǵyz basty zeınetkerlerge beriledi. Qaraǵandy oblysynda osy sanattaǵy azamattarǵa jatatyn 118 myń adam bar.
Tólem somasy kommýnaldyq qyzmet úshin esepteletin shot mólsherine baılanysty bolmaıdy jáne ol 15 myń teńgeni quraıdy.
Al aýyldyq jerlerde aı saıynǵy tólem 5 myń teńgeni qurasa da, 15 myń teńge derbes shotqa aýdarylady. «Keıin tutynýshylar osy aqshany tólemge jumsaı alady. Eger soma kóp bolsa, mysaly, qala turǵyndarynyń tólemi 18 myń bolsa, biz tek 15 myńdy ǵana shotqa aýdara alamyz, al qalǵanyn qyzmet alýshynyń ózi tóleıdi», dep túsindirdi Ulantaı Úsenov.
Basqarma basshysy sáýir aıyna tıesili tólemder mamyr aıynda berile bastaıtynyn aıtty. Kommýnaldyq qyzmet aqysy kórsetilgen túbirtekti alǵan azamattar jergilikti ákimdikterge habarlasyp, jeńildik alý úshin ótinish berýge quqyly. Ákimdik qyzmetkerleri ótinish berýshiniń málimetteri men jeke derekterin tekseredi. Eger, olar kómek alýǵa quqyly azamattardyń sanatyna jatatyn bolsa, onda derbes shotyna tıisti qarajat aýdarylady.
О́tinim úlgisi daıyn bolǵan soń, ol buqaralyq aqparat quraldarynda jáne áleýmettik jelilerde jarııalanady.