Osydan eki apta buryn Taraz qalasy «Qarasý alqaby» shaǵynaýdanyndaǵy kóppáterli turǵyn úıdiń kireberisi karantınge jabylǵan bolatyn. Atalǵan turǵyn úıdiń kireberisi 14 kún boıy polısııa qyzmetkerleriniń baqylaýynda bolǵan.
Oqshaýlanǵan kireberistiń turǵyndaryna eki apta páterlerinen shyǵýyna tyıym salynyp, osy aralyqta Taraz qalasynyń ákimdigi páter turǵyndaryn azyq-túlik ónimderimen qamtamasyz etken edi. Búgin Taraz qalasynyń ákimdigi sol «Qarasý alqaby» shaǵynaýdanyndaǵy turǵyn úı kireberisiniń karantındik rejıminiń aıaqtalǵanyn málimdedi.
Karantınge jabylǵan turǵyndarǵa tek jergilikti bılik qana emes, kásipkerler men belsendi azamattar da qoldaý kórsetken bolatyn. Aıta keteıik, Taraz qalasynda 7 sáýir kúni koronavırýs ınfeksııasyn juqtyrǵan 86 jastaǵy áıel tirkelip, naýqas anyqtalǵan «Qarasý alqaby» shaǵynaýdanyndaǵy kóppáterli turǵyn úıdiń kireberisi karantınge jabylǵan edi. Epıdemıologııalyq tekserý barysynda turǵynnyń 17 naýryz kúni Almaty qalasynan kelgen jaqyn týysymen baılanysta bolǵany anyqtalyp, ol ınfeksııalyq stasıonarǵa jatqyzylǵan. Al, onymen baılanysta bolǵan 5 adam anyqtalyp, olar karantınge ornalastyrylǵan. Atalǵan turǵyn úıdiń kireberisinde jáne turǵynnyń turǵylyqty jeri boıynsha dezınfeksııalyq óńdeý sharalary júrgizilgen. Osy kireberistegi páterlerde turatyn turǵyndar 14 kúnge oqshaýlanyp, olarǵa úıinen shyǵýǵa tyıym salynǵan. Taraz qalalyq taýarlar men kórsetiletin qyzmetterdiń sapasy men qyzmetterin baqylaý basqarmasy basshysynyń orynbasary Ǵabıt Ábdildániń aıtýynsha, búginde bul kireberiste oqshaýlanǵan 26 turǵynnyń 11-i 18-ge tolmaǵan balalar, al 15-i eresek adamdar eken. Osy 14 kún ishinde olardyń densaýlyq jaǵdaılary jergilikti emhanada baqylanyp, eshqandaı aýytqý belgileri baıqalmaǵan.
«Bul turǵyn úıde azyq-túlik qajettiligi boıynsha eshqandaı másele týyndaǵan joq. Sebebi, ákimdik tarapynan barlyq jaǵdaı jasaldy. Qant, maı, jumyrtqa, kókónis, kartop, barlyǵy ár azamatqa normaǵa saı jetkizildi. Bir sózben aıtqanda, qajetti qyzmettiń barlyǵy kórsetildi», deıdi Taraz qalasy ákimdigi kásipkerlik jáne ónerkásip bóliminiń basshysy Aspandııar Seısebaev.
Al atalǵan turǵyn úı kireberisiniń turǵyny Aıagóz Maılıeva «Biz sanepıdqadaǵalaý mekemesiniń talaptaryna saı 14 kún boıy úıden shyqpaı, medısına qyzmetkerleriniń kúndelikti baqylaýynda boldyq. Sonyń arqasynda basqa eshkimnen vırýs shyqqan joq. Osy 14 kún ishinde qala ákimdigi men demeýshilerdiń kómegimen bizge kúndelikti azyq-túligimiz ben ystyq tamaǵymyz jetkizilip otyrdy. Sol úshin azamattarǵa alǵysymyzdy aıtamyz», dedi.
21 sáýir kúni túngi saǵat 00.00-de atalǵan turǵyn úıde karantındik rejım aıaqtaldy. Turǵyndar osy aralyqta tekseris pen medısına mamandarynyń baqylaýynda boldy. Qatań baqylaý men kásibı qyzmettiń arqasynda turǵyndar indet juqtyrýdan aman.
Jambyl oblysy