Medısına ǵylymdarynyń doktory, Qazaqstan Ulttyq Ǵylym akademııasynyń akademıgi Rahıshev Alshynbaı Rahıshuly 89 jasynda ómirden ozdy.
Alshynbaı Rahıshev qazaqstandyq medısınanyń damýyna eleýli úles qosty. S. D. Asfendııarov atyndaǵy QazUMÝ Anatomııa kafedrasynda 25 jyl boıy basshylyq etti. "Energetıkalyq gaz lazerleri sáýlelenýiniń nerv jáne tamyr júıelerine áserin" zertteý boıynsha máselelerge eksperımenttik ázirleý júrgizdi.
A. Rahıshev ǵylymdy damytýǵa, kadrlar daıarlaýǵa jáne medısınalyq joǵary oqý oryndarynyń qazaqstandyq júıesin qalyptastyrýǵa eleýli úles qosty. Akademık iri ǵylymı forýmdarda sóz sóıledi, 1980 jyly Parıjde medısınadaǵy lazerlerdi qoldaný jóninde dúnıejúzilik qaýymdastyqqa Qurmetti prezıdenti bolyp saılandy.
Onyń tórt tomdyq "Adam anatomııasynyń atlasy" atty eńbegi úsh tilde jaryq kórse, medısına salasyndaǵy oqýlyqtyń memlekettik tilde shyǵýyna kóp eńbek sińirdi.Akademık "Qazaq medısınalyq termınologııasyn ázirleý men engizýdiń ǵylymı negizderi" baǵdarlamasyn oqý úrdisine engizýge kóp eńbek sińirdi. Ol Densaýlyq saqtaý mınıstrligi janyndaǵy termınologııalyq komıssııanyń, Qazaq ulttyq ensıklopedııasynyń Bas redaksııasynda qyzmet etti, Qazaqstannyń adamı kapıtaldyń damýyna, ulttyń ıntellektin qalyptastyrýǵa úlken úles qosty.
Alshynbaı Rahyshuly 1931 jyly Qaraǵandy oblysy, Qarqaraly aýdany, Tegisshildik aýylynda dúnıege kelgen. 1950 jyly Qaraǵandy medısınalyq ınstıtýtyna oqýǵa túsip, ony bitirgen soń aspırantýrada oqýyn jalǵastyrdy. 1961 jyly kandıdattyq dıssertasııasyn qorǵasa, 1963 jyly "Qalypty anatomııa" kafedrasynyń dosenti atanady. 1964 jyly Selınograd qalasyndaǵy jańa medısınalyq ınstıtýttyń oqý jáne ǵylymı jumys jónindegi prorektory bolyp taǵaıyndalady. 1966 jyly doktorlyq dıssertasııasyn qorǵaý úshin Lenıngradqa aýystyrady. Pavlov atyndaǵy Fızıologııa ınstıtýtynyń neıromorfologııa zerthanasynda aǵa ǵylymı qyzmetker retinde jumys istedi.
A. Rahıshev 1968 jyly Almaty memlekettik medısına ýnıversıtetiniń Qalypty anatomııa kafedrasyna shaqyrylady. 1969-1977 jyldary Alshynbaı Rahıshuly Almaty memlekettik medısına ınstıtýtynyń oqý isi jónindegi prorektory bolyp jumys istedi. Instıtýttyń oqý prosesin basqara otyryp, oqý-ádistemelik jumysty jan-jaqty jetilýine kóp kóńil bóldi. Rahıshev medısınada lazerlerdi qoldaný jónindegi dúnıejúzilik qaýymdastyqtyń qurmetti prezıdenti bolyp saılandy. 1994 jyly ulttyq patent vedomstvosy oǵan emdeý maqsatynda lazerlerdi qoldaný boıynsha ónertabysy úshin avtorlyq kýálikke ıe bolady. Alǵash ret QR joǵary medısınalyq mektebi úshin memlekettik tilde eki tomdyq Adam anatomııasy boıynsha oqýlyqty jazǵan da A. Rahıshev edi.
1978 jyldan bastap A. R. Rahıshev – Qazaq ulttyq medısına ınstıtýtynyń qalypty anatomııa kafedrasynyń meńgerýshisi, al 2003 jyldan bastap-qurmetti meńgerýshisi, sondaı-aq Qaraǵandy medısına akademııasy men Astana medısına akademııasynyń qurmetti professory atandy.