Elimizdiń óndiristik ortalyqtarynyń biri Aqtóbede shaǵyn jáne ortasha bıznes sýbektileriniń oblys ekonomıkasynyń damýyna qosqan úlesi 22-23 paıyz tóńireginde. Bul óndirisi damyǵan óńir úshin tómen kórsetkish emes.
Sondaı-aq óńirde shaǵyn jáne orta bıznespen shuǵyldanýshylar úlesi ekonomıkalyq jaǵynan belsendi halyqtyń 33,5 paıyzyn quraıdy. Bul derek respýblıkalyq ortasha kórsetkishten 3 paıyzǵa tómen. Sebebi ekonomıkalyq turǵyda belsendi azamattardyń deni óńirdegi iri kásiporyndarǵa shoǵyrlanǵan.
Pandemııanyń saldarynan óńirdegi shaǵyn jáne orta bıznes sýbektileriniń qabyrǵalaryna qara tastaı batyp júrgen máseleler az emes. Kásipkerlik ókilderi tarapynan túsken túrli saýaldy taldaǵan «Atameken» UKP Aqtóbe oblystyq bólimshesi basty másele salyq tólemderi ekenin anyqtaǵan bolatyn. Áıtse de Memleket basshysy shaǵyn kásipkerlik ókilderine qoldaý kórsetýdiń barlyq sharalaryn belgilep berdi. Jeńildikter salyq jáne nesıe tólemderine qatysty máselemen shektelip qalmaǵany aıan. Bul baǵytta Aqtóbe qalasyndaǵy saýda ortalyqtarynda kásipkerlerdiń jalǵa alatyn oryndaryna tólenetin aqy 30-70 paıyzǵa deıin azaıtyldy.
– Búginge deıin shaǵyn jáne orta bıznes sýbektileri tarapynan nesıeni keıinge qaldyrý máselesi boıynsha 765 tapsyrys tústi. Soǵan sáıkes jalpy somasy 11 mlrd teńge nesıe qarajaty boıynsha 694 tapsyrys maquldandy. Sóıtip, kásiporyndar úshin bir aıdan úsh aıǵa deıingi nesıe qarajattaryn keıinge qaldyrý merzimi qarastyryldy, – dedi «Atameken» oblystyq kásipkerler palatasynyń dırektory Anar Darjanova.
Aqtóbe oblysy