Oral qalasynda ózin «bank qyzmetkerimin» dep tanystyrǵan alaıaq 62 jastaǵy zeınetker áıeldi aldap soǵyp, 1 mln 440 myń teńgege otyrǵyzyp ketken.
Oqıǵa bylaı bolǵan: zeınetker áıelge belgisiz er adam habarlasyp, ózin Kaspıı bankiniń qaýipsizdik qyzmetinen ekendigin, áldebireýler munyń atynan nesıe toltyrǵaly jatqanyn aıtyp, saqtandyrǵan. Ári-beri áńgimeden keıin onyń senimine kirip, ózi nesıe alyp bere alatynyn aıtady. Osylaısha áıel áýeli ózine, keıin qyzyna da nesıe toltyrady.
Munymen qoımaı «qaýipsizdik qyzmetkeri» álgi áıeldiń depozıti bar-joǵyn surap, ondaǵy bar aqshany senimdi shotqa aýdarýǵa keńes beredi. Áıel barlyq aıtqanyn múltiksiz oryndaıdy.
Aqyr sońynda áıel alaıaqqa jalpy somasy 1 mln 440 myń teńge kóleminde aqsha aýdaryp jibergen.
«Oral qalalyq Polısııa basqarmasy osy oqıǵa boıynsha qylmysty ashý úshin Qylmystyq Kodekstiń 190-baby 2-bólimine (alaıaqtyq) sáıkes sotqa deıingi tergeý amaldaryn bastady» dep habarlaıdy polısııanyń baspasóz qyzmeti.
Osyǵan uqsas oqıǵa bıylǵy naýryz aıynyń 30-y kúni bolǵan eken. Ol kezde Oral qalasynyń 31 jastaǵy turǵyny onlaın nesıe alyp beremin degen alaıaqqa senip, «Kaspi.kz» qosymshasy arqyly 56 700 teńge aqshasyn aýdaryp jibergen.
Karantın kezinde kóp is-áreket onlaın arqyly júrip jatyr. Osy kezde alaıaqtardyń arbaýyna túsip qalmaý úshin polısııa bank kartasyndaǵy jeke derekterdi, paroldar men SMS-kodtardy bógde adamǵa kórsetýge bolmaıtynyn eskertedi.
Batys Qazaqstan