Batys Qazaqstan oblysynda COVID-19 ınfeksııasyn juqtyrǵan adamdardyń sany 26 sáýir tańerteń 116-ǵa jetti. Sońǵy táýlikte anyqtalǵan 13 adamnyń bári de – Reseı Federasııasynan kelgen jumysshylar.
Koronavırýs ınfeksııasy tabylǵan adamdardyń barlyǵy da Reseı Federasııasynda jumys isteıtin Qazaqstan Respýblıkasynyń azamattary. Olardyń 6-ýy – Batys Qazaqstan oblysynyń, 5-i – Almaty oblysynyń, 2-i – Túrkistan jáne Qaraǵandy oblystarynyń turǵyndary. Bulardyń keıbiri Máskeý qalasynan kelgen, Saratov oblysynda jeke qurylyspen aınalysyp, elge oralǵandary da bar. Olar shekara beketinen ótken soń Tasqala aýdanyndaǵy karantındik ortalyqta boldy. Sol jerde tıisti dıagnostıkalyq zertteýler júrgizilgen soń 13 azamat ta oblystyq juqpaly aýrýlar aýrýhanasyna jatqyzyldy, - dedi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Ermekuly.
Bul azamattardyń jasy 19 ben 49 aralyǵynda.
Búgingi jaqsy jańalyq – osy kezge deıin koronavırýstan jazylyp shyqqan 2 adamnyń qataryna taǵy 4 adam qosyldy. Olar eki márte test nátıjesinen keıin jazylǵany anyqtalyp, úılerine jiberilgen.
Dál qazir Batys Qazaqstan oblystyq juqpaly aýrýlar aýrýhanasynda – 110 adam, provızorlyq stasıonarda – 25, karantındik stasıonarda – 89, al úı karantıninde – 1450 adam oqshaýlandy.
- Mamandarymyz qazir kúni-túni jumys istep, qaterli dertpen kúresip jatyr. Bul tek oblys turǵyndaryn emes, búkil Qazaqstan halqyn aman saqtaý, indetti odan ári taratpaý úshin jasalyp otyrǵanyn túsinseńizder eken. Jeke bas gıgıenasyn, karantın talaptaryn saqtaýdy suraımyz, - dedi Nurlybek Mustaev qoshtasarda.
Batys Qazaqstan