Tótenshe jaǵdaı kezeńi 11 mamyrǵa deıin uzartylatyny habarlanǵan málimdemesinde Memleket basshysy Qasym-Jomart kóktemniń jurtqa qolaıly kezeńinde saıajaı ıeleri de qatty alańdap otyrǵanyn aıtqan bolatyn. Osy oraıda Túrkistan qalasynyń ákimi Rashıd Aıýpov karantın kezeńinde qalaǵa kirip shyǵý jáne ishki qozǵalys úshin ruqsatnama alý tizimine saıajaıǵa barý jáne turǵyn úıden 150 metr radıýsta serýendeý múmkindikteri qosylǵanyn jarııa etti.
«Saıajaıǵa barýǵa juma-jeksenbi kúnderi saǵat 06/00-10/00 jáne saǵat 17/00-19/00 aralyǵynda ruqsat etilgen. Ol úshin aldyn ala onlaın tirkelý barysynda: shyǵatyn - baratyn mekenjaıdy, kólik málimetterin, menshik ıesi quqyn rastaıtyn qujatty jazýyńyz qajet. Saıajaı ıesi menshiktik quqyn rastaıtyn qujatty ózimen ala júrýge mindetti. Bir kólik ishinde, júrgizýshini qosqanda, adam sany 3-ten aspaý kerek. Árbiriniń jeke kýáligi bolýy jáne betperde taǵýy qatań qadaǵalanady. Serýenge tańǵy alty men túngi onǵa deıin ruqsat etile, bir saǵattyq shekteý qoıylǵan. Jeke kýáligińizdi ala shyǵýdy, araqashyqtyqty saqtaýdy jáne úsh adamnan artyq jınalmaýdy umytpaǵaısyzdar. Basqa úıge qonaqqa barýǵa jáne erterekte jarııalanǵan sharalardy buzýǵa bolmaıdy», delingen qala ákiminiń habarlamasynda.
Túrkistan oblysy