Memleket basshysy keshegi málimdemesinde elimizdiń barlyq aımaǵynda jumystaryn bastaıtyn mekemelerdiń tizimin jasaqtaýdy tapsyrǵany belgili.
Osyǵan baılanysty Qyzylorda oblysynda kezeń-kezeńimen jumysqa kirisetin mekemeler men ondaǵy jumysshylardyń sany naqtylanýda. Bul týraly búgingi brıfıngte oblystyq ekonomıka jáne bıýdjetti josparlaý basqarmasynyń basshysy Nurǵalı Qordabaı habarlady.
Basqarma basshysynyń aıtýynsha áýeli 13 573 jumysshysy bar 2 384 mekeme iske qosylyp, ekinshi kezeńde 12895 jumysshysy bar 2 935 mekeme jumysyn bastaıdy.
-Kóktemgi-dala jumystary naýryz aıynyń ekinshi onkúndiginde bastalyp ketti. Qazirgi ýaqytta 8,5 myń gektar kúrish, 28,8 myń gektar jońyshqa, bıdaı, arpa jáne maqsary egildi. Kóktemgi dala jumystaryn júrgizýge 14 myń tonna arzandatylǵan janar-jaǵar maı bólindi. 3,5 myńnan astam aýyl sharýashylyǵy tehnıkasy jumyldyryldy, – dedi basqarma basshysy.
Sondaı-aq oblystyń ónerkásip salasyndaǵy 12 munaı óndirýshi jáne 4 ýran óndirýshi kompanııa qyzmetin toqtatqan joq. Qyzmetkerlerdiń kelisimimen vahtalyq merzim ýaqyty 14 kúnnen 28 kúnge deıin uzartyldy.