Túrkistan oblysynda búginnen bastap barlyq sanıtarlyq normalar men talaptardy saqtaı otyra, hımııalyq tazalaý, kir jýý, kilem tazartý nysandary, sán salondary, shashtaraz nysandaryna jumys isteýge múmkindik berildi. Azamattar qyzmet kórsetý oryndaryna aldyn ala jazylý arqyly bes adamnan aspaıtyndaı retpen barýy tıis.
Bul týraly oblys ákiminiń orynbasary Saken Qalqamanov onlaın-konferensııada málimdedi. Sondaı-aq turmystyq jóndeý ortalyqtary jetkizý qyzmetin kórsetetin bolady. Avtojýý, dóńgelek aýystyrý, maı aýystyrý ortalyqtary, tokarlyq, dánekerleý, jıhaz sehtary, atele, kıim men aıaq kıimdi jóndeý, kásiporyndar, qurylys bazarlary men dúkenderi de óz jumysyn bastaıdy. Al ekinshi deńgeıli bankter, «Qazpochta» bólimsheleri men kóktemgi egin egý jumysy úshin nesıe beretin mıkroqarjy uıymdary, lombardtar jáne aıyrbastaý pýnktteri qyzmetine kirisse, ashanalar men tamaqtaný oryndary 8.00-22.00 aralyǵynda tamaqty onlaın tapsyrys arqyly daıarlap, jetkizý qyzmetin atqarady.
Azyq-túlik satatyn kóterme saýda oryndary men dúkender, dezınfeksııalyq rejimdi saqtaı otyryp jumys isteıdi, dárihana, qonaqúıler, notarıýstar, advokat keńseleri de qyzmetine kirispek. Sondaı-aq S.Qalqamanov turǵyndarǵa saıajaılar men baý-baqshalaryna saǵat tańǵy 6:00-den 21:00-ge deıin ruqsatnama (propýsk) júıesine sáıkes barýǵa ruqsat etiletinin jetkizdi. Olar ózderimen birge saıajaı nemese baqsha menshigin rastaıtyn qujattaryn alyp júrýi qajet.
Barlyq iske qosylǵan nysandarda kúndelikti dezınfeksııalaý jumystary júrgiziledi. Sanıtarlyq normalar men sanıtarlyq qaýipsizdik talaptary saqtalmaǵan jaǵdaıda, zańǵa sáıkes qatań sharalar qoldanylady nemese sol mezette qyzmeti toqtatylady.