Ardagerlerdiń áleýmettik turǵydaǵy máseleleri udaıy nazarda. Uly Jeńistiń 75 jyldyq mereıtoıy qarsańynda maıdangerlerge 1 mıllıon teńgeden qarjylaı kómek kórsetildi. Sondaı-aq, aǵa býyn ókilderine turmystyq jáne ataýly kómek kórsetýde óńirdegi volonterlar men jekelegen kásiporyndar da belsene atsalysýda.
Qazirgi tańda aımaqta turatyn 36 maıdanger tolyq qamqorlyqqa alynǵan. Qoǵam belsendileri men volonterlar ardagerlerge medısınalyq kómek pen turmystaǵy kúndelikti járdem kórsetý sııaqty birqatar mańyzdy máseleni óz moıyndaryna alǵan.
–Úkimet osy Uly Otan soǵysyna qatysqandarǵa kómegin jyldan-jylǵa kóbeıtip, qamqorlyqty molaıtyp kele jatqanyn basa aıtýymyz kerek. Bıyl Uly Otan soǵysyna qatysýshylar men múgedekterge 1 mıllıon teńge qarjylaı kómek kórsetilip jatyr. Odan basqa 4695 soǵysqa qatysqandarǵa teńestirilgender bar. Olarǵa da 30 myńnan 100 myń teńge aralyǵynda kómek kórsetiledi. Budan basqa «Nur Otan» partııasynyń janashyrlyǵymen múgedekterge jáne asa muqtaj qarttarǵa 50 myń teńgeden kómek kórsetilmekshi,– deıdi oblystyq ardagerler keńesiniń tóraǵasy Ǵosman Tóleǵul.
Aýǵan soǵysyna qatysýshylar men tyl ardagerleri jáne oǵan teńdestirilgender de nazardan tys qalmaıdy. Qazir Kókshetaýda 14 ardager bar. Olardyń árqaısyna qajetinshe kómek kórsetiledi.
Eldegi tótenshe jaǵdaıǵa baılanysty Uly Jeńistiń 75 jyldyq mereıtoıyna arnalǵan mádenı kópshilik is-sharalar onlaın túrinde uıymdastyrylmaqshy. Uly Jeńiske jetý jolyndaǵy maıdangerlerdiń eren erligi halyq jadynda máńgi saqtalady.
Aqmola oblysy