Jaqsy aýdanynyń dıqan mehanızatorlary kóktemgi egis naýqanyna saqadaı saı. Qajetti tehnıkany jóndeýden ótkizip, tuqym qoryn tolyqtyryp alǵan. Endigisi kóktemniń ashyq ár sátin tıimdi paıdalanyp, ýaqytyly dán sińirý.
Tótenshe jaǵdaı kezinde óńir sharýalarynyń júrip-turýyna jaǵdaı jasalǵan. Qazirgi ýaqytta ylǵal jabý jumystary júrgizilýde. Ústimizdegi jyly Jaqsy aýdanynda 470 myń gektar jerge dán sińirilmek. Onyń ishinde kóp aýmaqty dándi jáne dándi-burshaqty daqyldar alady. Aldyn-ala jasalǵan josparǵa sáıkes bıdaı, arpa, suly, burshaq egiledi. Al maıly daqyldardan zyǵyr, kúnbaǵys, qysha jáne kókónis daqyldarynan kartopqa arnaıy alqaptar daıyndalǵan.
– 212 myń gektar jerge ylǵal jabý jumystary júrgizildi. Jyl basynan beri 4700 tonna mıneraldy tyńaıtqysh satyp alyndy. Kóktemgi egis jumystaryn júrgizý úshin «Jaqsy-Qıma» nesıelik seriktestigi arqyly 599 mln teńge kóleminde nesıe alýǵa ótinim berildi. Búginde onyń 566 mln teńgesi qarjylandyryldy. Qazirgi tótenshe jaǵdaı kezinde aýdannyń aýyl sharýashylyǵy qurylymdarynyń, aýyl sharýashylyǵy taýarlaryn óndirýshileriniń blok-beketterden emin-erkin júrip turý qamtamasyz etildi,–deıdi Jaqsy aýdany ákiminiń orynbasary Rústem Ramazanov.
Budan bólek, aýdanda mal sharýashylyǵyn damytýǵa da úlken kóńil bólýde. Máselen «Sybaǵa» baǵdarlamasy arqyly 400 bas asyl tuqymdy mal satyp alyp, 8 et fermasyn qurý jospary bar. Al «Vıktor» sharýashylyǵy bazasynda 100 bas saýyn sıyry bar sút fermasynyń qurylysyn salý josparlanyp otyr. Joba quny – 160 mln teńge.
Aýyl sharýashylyǵymen dendep aınalysatyn aýdandaǵy tynys-tirshilik jyldaǵy qalypta. Qazir dıqandar birer kúnnen soń dán egýge shyǵamyz dep dalanyń degdýin kútip otyr.
Jaqsy aýdany
Aqmola oblysy