Memleket basshysynyń Jarlyǵymen úlgili qyzmeti, zańdylyq pen quqyq tártibin nyǵaıtýdaǵy isine adaldyǵy úshin Sybaılas jemqorlyqqa qarsy is-qımyl agenttigi Tóraǵasynyń orynbasarlary Oljas Bektenov pen Shyńǵys Qabdýlaǵa 3-sanattaǵy joǵary biliktilik synyptary berildi. Alık Shpekbaev Prezıdenttiń tapsyrmasy boıynsha Otan qorǵaýshylar men Jeńis kúnderin merekeleýge arnalǵan saltanatty jıynda olarǵa general pogondaryn tabystady.
Sondaı-aq Agenttik Tóraǵasy Memleket basshysynyń atynan qyzmettik mindetterin oryndaý barysynda kórsetken erligi men janqııarlyǵy, zańdylyq pen quqyq tártibin nyǵaıtýǵa qosqan úlesi úshin memlekettik nagradalardy tapsyrdy.
Atap aıtqanda, II dárejeli «Aıbyn» ordenderimen Kadr jumysy departamentiniń basshysy M. Muhambetqazy, 2-shi departament basshysynyń orynbasary J. Ǵalymov, Almaty jáne Shymkent qalalary boıynsha Departamentter basshylarynyń orynbasarlary T. Bashev pen B. Uzynjas marapattaldy.
«Qurmet» ordenimen Strategııa jáne jedel basqarý departamentiniń basshysy N. Jaqsymbetov, «Erligi úshin» medalimen 5-shi departamenttiń asa mańyzdy ister jónindegi ofıseri A.Besjanov marapattaldy.
Agenttik Tóraǵasynyń buıryǵymen úlgili qyzmeti men jumysta joǵary nátıjelerge qol jetkizgeni úshin 108 qyzmetkerge vedomstvolyq nagradalar jáne ataqtar tabystaldy. Sonymen qatar erekshe qyzmeti úshin qyzmetkerlerdiń ata-analaryna alǵys hattar joldandy.