Almaty oblysy, Ile aýdany, Aqshı aýylynda dúnıege kelgen egiz ul – Qasym men Jomart Oryntaı búginde Oral qalasynda Otan aldyndaǵy paryzyn atqaryp júr.
– Aǵaıyndy sarbazdar 5517 áskerı bólimde baılanys torabyna kezekshi radıotelegrafıst mindetin atqarýda. Jomart jaýyngerlik qyzmetke tańda tússe, Qasym túngi aýysymdy almastyrady. Jaýyngerler leıtenant Abaı Qojamurat pen efreıtor Eldar Samıǵolla úıretken árbir tálimdi jadynda saqtap, is júzine qoldanyp júr, – deıdi osy áskerı bólimniń qyzmetkeri, maıor Jamal Muqysheva. Qasym men Jomart jaýyngerlik kezekshilikte árdaıym qyraǵylyq tanytyp, áskerı mindetin jaýapkershilikpen atqarǵany úshin birneshe ret marapatqa da ıe bolypty.
Kóp balaly otbasynda dúnıege kelgen qos sarbaz ásker qataryna Almaty oblysynan 2019 jyldyń jaz aıynda shaqyrylǵan. Oryntaı áýletiniń kenjesi jaýyngerlik daıyndyq normatıvterin árdaıym eń úzdik baǵaǵa oryndaıdy eken.
– Áskerge kelgenime qýanamyn. Bul jerde úıdegideı erkindik bolmasa da, árbir isińe jaýapkershilikpen qaraýdy úırenesiń. Jalpy, áskerı ómirdi kórý, qatal tártipti bastan ótkerý árbir jas jigitke shyńdalý úshin qajet. Otan aldyndaǵy áskerı boryshymdy aman-esen atqaryp, elge oralǵan soń polısııa qatarynda qyzmet etkim keledi, – deıdi Qasym.
– Jas kúnimnen sportty serik ettim. Sondyqtan bolar, ásker qataryndaǵy jattyǵýlar men úshin asa qıyndyq týǵyzǵan joq, – deıdi jas kúninen fýtbolshy retinde talaı jarysqa qatysyp, júldeger bolǵan Jomart. Ol áskerden keıin de sporttyq mansabyn jalǵastyrmaq.
Erekshe esimdi ıelengen egiz sarbaz búkil Qazaqstan halqyn Otan qorǵaýshylar kúnimen quttyqtap, áskerı mindetin abyroımen atqarýǵa ýáde berip otyr.
Batys Qazaqstan oblysy