Esil qalasynda «Jumyspen qamtýdyń jol kartasy-2020» baǵdarlamasy aıasynda birqatar ınfraqurylymdyq joba júzege asýda. Qazirgi ýaqytta Esil qalasy kósheleriniń joldary qalypqa keltirilip, mektep qurylysy qolǵa alynbaq.
Qala kóshelerine ortasha jóndeý jumystaryn júrgizetin merdigerdi anyqtaý úshin aldymen arnaıy konkýrs taǵaıyndalǵan. Jóndeý jumystary kezinde 9 adam eńbekpen qamtylmaq. «Jumyspen qamtýdyń jol kartasy-2020» baǵdarlamasy aıasynda kóshe joldaryn qalypqa keltirý úshin respýblıkalyq bıýdjetten 50 mln teńge bólingen.
– Tender utyp aldyq. Qazir Áýezov kóshesine jóndeý jumystaryn júrgizýdemiz. Mamyr, maýsym aılarynda aıaqtaımyz dep josparlap otyrmyz, – dedi «Mırash-n» seriktestiginiń dırektory Asqarbek Shaıahmetov.
Budan bólek, qaladaǵy №2 orta mektepke kúrdeli jóndeý jumystary júrgiziledi. Munda 400-deı oqýshy bilim alady.
Qazirgi ýaqytta kúrdeli jóndeý jumystaryna daıyndyq bastalyp ketti. Mekteptiń jóndeý jumystaryna respýblıkalyq qazynadan 335 mln teńgeden artyq qarjy bólingen.
Esil aýdany,
Aqmola oblysy