Karantın kezinde sporttyq babyn bosańsytyp alǵan boksshy balalar taza aýaǵa shyǵyp, jattyǵý jumystaryn júıeli júrgizip jatyr. Tájirıbeli jattyqtyrýshy, sport sheberi Ǵaıdar Satanov shákirtterin qashyqtyqqa arnalǵan baǵdarlamaǵa saı daıyndaý ústinde.
«Sentralnyı» shaǵyn aýdanyndaǵy bir-birine japsarlasa salynǵan sporttyq alań sol tóńirektiń turǵyndaryna toly. Olardyń jas mólsheri de ártúrli. Solardyń arasynan keshegi keńes odaǵy kezinde bokstan Kókshetaý oblysynyń namysyn laıyqty qorǵaǵan alpystyń asqaryndaǵy Ǵalymjan Aıbasov, Erǵalı Eskendirov, Erik Júsipovterdi kórip, kóńilimiz marqaıyp qaldy.
– Karantın rejımi az-kem jeńildetilgennen keıin otbasymyzben osy sport alańyna kelip, tańǵy jattyǵýlar jasap júrmiz. Nemerelerimmen jasty balǵyn boksshylardyń daıyndyǵyn kórip, osydan jarty ǵasyr burynǵy sharshy alańdaǵy shaıqastarymdy kóz aldyma elestetemin. Sportshy úshin qandaı jaǵdaıda bolmasyn babynda bolý qajet. Myna balalardan sol qasıetti kórip qýanamyn, – deıdi boks ardageri Ǵalymjan Aıbasov.
Shaǵyn ǵana toppen jattyǵý júrgizip jatqan boks bapkerin áńgimege tarttyq.
– Kún jylynǵaly osy tóńirekte turatyn birneshe balany jattyǵýǵa shaqyrdym. Olarmen karantın erejesine saı arnaıy baǵdarlamamen jumys isteımin. Fızıkalyq daıyndyqqa erekshe mán beremiz. Bokstyń ózge de ádisterin úıretip jatyrmyn. Ara qashyqtyqty qatań saqtaımyz, – deıdi bapker Ǵaıdar Satanov.
Taza aýada daıyndyq jasap jatqan jasóspirim boksshylardyń arasynda qala, oblys chempıony atanyp úlgergen óreńder de az emes.
Biraz ýaqyt boks zalyna barmaǵan balǵyndardyń taza aýada jattyǵýy olardyń boıyn sergitip, sheberlikterin shırata túsýde. Jattyǵýdan soń óreńder boks ardageri Ǵalymjan Aıbasov atalarymen emen jarqyn áńgimelesip, batasyn aldy.
Kókshetaý qalasy.