Túrkistan oblysynda tehnogendik sıpattaǵy tótenshe jaǵdaı oryn alǵannan keıin aqtóbelikter qıyn jaǵdaıǵa tap bolǵan maqtaaraldyqtarǵa qoldaý kórsetý qajet dep tapty. Sóıtip olar bir jaǵadan bas, bir jeńnen qol shyǵara otyryp, qysqa ýaqyttyń ishinde Ońtústik óńirge jiberiletin gýmanıtarlyq kómek qoryn jasaqtady.
Ony jınaýǵa Aqtóbe qalalyq ákimdiginiń qoldaýyna sáıkes AntiCovid-19 volonterlar toby kómek kórsetti. Osylaısha Aqtóbeden Túrkistan oblysynyń Maqtaaral aýdanyna azyq-túlik pen kıim-keshek jáne ózge de qajetti qural-jabdyqtar tıelgen 25 júk avtokóligi attanyp ketti. Osy qaıyrymdylyq kómekke baılanysty Aqtóbe qalasynyń ákimi Ashat Shaharov «Egemen.kz» tilshisine óz oı-pikirin tómendegishe jetkizdi.
- Maqtaaral aýdanynyń kóptegen turǵyndarynyń úılerin tehnogendik apat kezinde sý basyp qaldy. Sonymen birge olardyń dúnıe múlikteri de búlindi. Osyndaı qıyn kezeńde joǵarydan eshqandaı nusqaý kútpesten aýyzbirshilik tanytyp, qoldaryndaǵy baryn bólisken aqtóbelik turǵyndarǵa alǵysymyz sheksiz. Volonterler men júk kóliginiń júrgizýshilerine de alǵysymyz mol. Olarǵa aq joldaryńyz bolsyn demekpiz, - dedi ol.