Prezıdent Q.Toqaev basymdyq bergen «Halyq únine qulaq asatyn memleket» saıasaty pandemııa kezinde jandana tústi. Azamattyq qoǵamdaǵy máselelerge nazar salyp, buqaralyq aqparat quraldarynda aıtylǵan kózqarastarǵa qulaq saldy.
Tótenshe jaǵdaı toqtatylsa da, karantın tártibin saqtaý qajettigin umytpaǵan jón. Aqparat quraldaryna sensek, kórshiles Qytaıda sáýir aıynda vırýstyń ekinshi tolqyny bolǵan. Iаǵnı bul saqtyq sharalaryn saqtaný kerektigin bildiredi. Reseıdegi jaǵdaı bárimizge málim. Bir aptada ǵana vırýs juqtyrǵan adamdar sany kúrt ósip, toǵyzynshy orynnan úshinshi orynǵa kóterildi. Reseı – kórshiles memleket, sonymen qatar EAEO múshesi. Biz de osy jaǵdaıdy eskerýimiz qajet.
Prezıdent málimdemesiniń negizgi maqsaty – epıdemııalyq jaǵdaıdan ekonomıkalyq saıasatqa qaraı bet burý. Q.Toqaev aıtyp ótkendeı, Úkimettiń aldyn ala qabyldanǵan sharalarynyń nátıjesinde vırýstyń taralýyn tejedik. Endigi kezekte post-pandemııalyq kezeńdegi ekonomıkany umytpaýymyz qajet. Ekonomıka budan ári qalaı damıdy, qandaı tetikterdi qosý qajet, qandaı salalarǵa den qoıý qajet degen saýaldarǵa jaýap izdegen abzal. Qazaqstan budan bylaı qandaı ekonomıkalyq saıasatty ustanatynyn da qazirden belgileý kerek. Qazir barlyq álem aýyr jaǵdaıda. Sondyqtan munyń bizdiń memleketke de áseri bolýy múmkin. Úndeýdiń basty mazmunyna qaıtyp oralsaq, karantın sharalaryn saqtaý áli de ózekti ekenin esten shyǵarmaǵan jón.
Erlan Mádıev,
Álemdik ekonomıka jáne saıasat ınstıtýtynyń sarapshysy