Bilim berý salasy jańa tehnologııanyń múmkindigin paıdalanýda. Buǵan deıin elimizdegi keıbir joǵary oqý oryndary ishinara qashyqtan bilim alýǵa satylap kóshse, elimizge ǵana emes, búkil álemge taraǵan indet saldarynan bul júıeni orta bilim beretin mekemeler de meńgerýge májbúr boldy.
Bul mektep oqýshylary úshin de, bilim júıesi úshin de eń tıimdi sheshim. Tıisti mınıstrlik tótenshe jaǵdaı engizilgen kúnnen bastap elimizdegi bilim uıalaryn qashyqtan oqýǵa kóshirýdi jedel josparlap, qyzý daıyndyqqa kiristi. Árıne alǵash ret betpe-bet kelip otyrǵan júıeni engizýde kútpegen kedergiler men qıyndyqtar boldy. Muny Bilim jáne ǵylym mınıstri A.Aımaǵambetovtiń ózi de jasyrǵan joq. «Biz bul júıege tótenshe jaǵdaı saldarynan kóship otyrmyz. Elimizdiń orta bilim júıesinde qashyqtan oqytý buryn-sońdy bolmaǵan, tipti «Bilim týraly» Zańda da qarastyrylmaǵan. Ol ol ma, ınternet platformasy da daıyn emes. Sondyqtan bul ýaqytsha qıyndyqqa túsinistik tanytyńyzdar», dedi mınıstr.
Áýelde synama sabaq bolyp, respýblıkanyń túkpir-túkpirindegi oqýshylardyń qashyqtan bilim alýǵa qatysýyn qadaǵalaǵan mamandarda san túrli saýal týyndady. Keıbir otbasynda kompıýter jetispeýshiligi, endi birinde ınternettiń joqtyǵy kózge kórinip turdy. Osy túıtkildi eskergen mınıstrlik 800 myńnan astam kompıýter, planshet, aıpad qurylǵysyn satyp alyp, turmysy tómen otbasy balalaryna beretinin de aıtty. Odan bólek óńirdegi jergilikti kásipkerler de jomarttyq tanytyp, oqýshylardyń bilim alýyna múmkindik syılady.
Al Almaty qalasynyń oqýshylary bul júıege ońaı tóselip aldy. Ásirese, Alataý aýdanyna qarasty №178 lıseıiniń ustaz qaýymy IV toqsan bastalǵan sátten-aq ata-ana men oqýshyǵa qoldaý bildirip, ózara aýyzbirlikte jumys istedi. Bilim berýdiń barlyq platformasyn paıdalanyp, utymdy jerin alýǵa tyrysty.
№178 lıseı dırektory Qaıratbek Shadıevtiń aıtýynsha, qashyqtan bilim berý júıesinde kóp nárse keri baılanys jasaıtyn muǵalimge, muǵalimdi qoldaıtyn ata-anaǵa baılanysty. «Eger olar ózara aýyzbirlikte jumys istese, nátıjeli kórsetkishke qol jetkizýge bolady», deıdi mektep dırektory. Al lıseı dırektorynyń oqý isi jónindegi orynbasary Gúljan Saýytqyzynyń aıtýynsha, álemdegi 167 memlekettiń tájirıbesine súıenip, qashyqtyq júıede bilim alyp jatqan mektep oqýshylary keri baılanys ornatýda Kundelik platformasyn keńinen paıdalanǵan. Bul turǵyda mektep ujymy arnaıy saýaldama da júrgizdi. «Nátıjesine qarasaq, oqýshylar muǵalimderdiń sabaq berý nátıjesin 67,4 paıyzben joǵary baǵalady. Muǵalimder men oqýshylar ózara keri baılanys jasaǵany qýantty. Demek, ustaz qaýymy da, oqýshylar da sıfrly saýatyn arttyryp, bilim berý resýrstaryn tıimdi paıdalanýdy úırendi degen sóz», deıdi Gúljan Shajabaeva.
Árıne bıylǵy oqý jyly mektep túlekterine kútpegen «tosynsyı» jasady. Alda UBT synaǵy kútip tur. Qazir 11-synyp oqýshylary shama-sharqynsha ózderi daıyndalýda. Az kúnnen soń altyn uıadan ushqaly otyrǵan túlekter mektep ujymy men synyp jetekshisiniń qoldaýyna zárý ekeni túsinikti.
№178 lıseıiniń 11 «E» synyp jetekshisi, aǵylshyn tili pániniń muǵalimi Tanıa Ernazarqyzy Bekbolatova: «Árıne balalar mektep bitiretin sátten tátti estelik qalǵanyn qalady. Sońǵy qońyraý saltanatynda kóz aldymda ósken ul-qyzdarymdy qolymnan ushyramyn degen meniń de armanym boldy. Biraq ár nárseniń qaıyry bar. Biz ǵana emes, álemdegi mıllıondaǵan oqýshy qashyqtan oqý júıesine kóship, sońǵy qońyraýdy jyldaǵydan ózgeshe ótkizgeni otyr. Osy jaǵdaıǵa baılanysty mınıstrliktiń memlekettik emtıhandy alyp tastaýy da úlken jeńildik. Sondyqtan túlekter jańa ómirge qadam basar aldynda sabyrly bolyp, UBT synaǵynan súrinbeı ótse degen tilegim bar», dep aǵynan jaryldy.
Qashyqtan bilim berý júıesin engizbes buryn álemdegi 167 memlekettiń tájirıbesine súıendik. Qazir osy júıemen elimizdegi 5 mln-nan astam oqýshy men stýdent bilim alýda. Qashyqtan bilim berý – oqýshyny jańashyldyqqa, tyń izdeniske jeteleıtinin kórsetti. Al osyndaı qysyltaıań shaqta jan-jaqty bilim berýge bar kúsh-jigerin salǵan ustaz qaýymyna ata-analar tarapynan alǵysy zor.
Dınara Myńjasarqyzy,
jýrnalıst
Almaty qalasy