Otbasy – ómirdiń tutqasy. Úı-ishiniń qyzyqqa, qýanyshqa toly bolýy otbasyndaǵy baýyrmaldyq, bereke-birlikke baılanysty. Mamyrbaevtar áýleti – shańyraqtyń osyndaı qadir-qasıetin óreli hám tálimdi urpaǵynyń arqasynda jalǵastyryp otyrǵan mereıli otbasynyń biri. Tárbıe – otbasynyń úzilmeıtin jelisi.
Serik ata búginde shańyraqtyń kóz qýanyshyna aınalǵan nemereleri men shóbereleriniń baǵyndyrar asýy bıik bolsa eken degen atalyq tilekpen kún keship jatyr.
Serik Mamyrbaıuly ómiriniń 51 jyly mektepte oqýshylarǵa sabaq berip, tárbıeleýmen ótti. Aldynan myńdaǵan shákirt bilim alyp, túlep ushty. Olar búginde ómirdiń san túrli joldarynda eńbek etip júr. Eseli eńbeginiń arqasynda abyroıǵa bólendi. «Halyq aǵartý isiniń ozyq qyzmetkeri», Baızaq aýdanynyń Qurmetti azamaty atandy. Birneshe medal men Qurmet gramotasynyń ıegeri.
Serik atanyń jary Manat apanyń da bar eńbek joly mekteppen baılanysty. 1959 jyly aýyldaǵy bilim ordasyna kitaphanashy bolyp ornalasqan ol bir ornynda tapjylmastan eńbek etip, 1994 jyly zeınetkerlikke shyqty. Dúnıege 15 perzent ákelgen Batyr Ana.
– Allanyń bergeni, 13 balam aman-esen ósip, erjetti, úbirli-shúbirli boldy. Tek osydan eki jyl buryn dáriger bolyp eńbek etip júrgen úlken qyzym aıaq astynan baqılyq bolyp ketti. Ár balanyń óz nesibesi bar ǵoı. 11 balam joǵary bilim aldy. Eńbek ete júrip, dúnıege keltirip, solardy qatarǵa qostyq, – deıdi Manat apa aǵynan jarylyp.
Shynynda, Mamyrbaevtarǵa osynsha balany jetelep júrip jetildirý ońaı boldy deısiz be? Endi búginde sol perzentteriniń raqatyn kórip otyr. Osyndaı ata-ananyń tárbıesin kórgen ul-qyzdary da shetinen eńbekqor, aqkóńil jandar. Jeti kelin túsirdi. 7 ul, 6 qyzdyń ishinen altaýy jáne kelini áke jolyn qýyp, ustaz atandy. Budan bólek, eki qyzy joǵary bilimdi dáriger, Esbolaty – ınjener, Bekbolat – kásipker, Erbolat – jol qurylysynda, Shymbolat – gazette jaýapty qyzmetker, eń kenjesi Aqbolaty áskerı bólimde qyzmet etedi.
Tárbıe basy – tal besik. Serik ata men Manat apa ul-qyzdarynan órbigen 35 nemere men 29 shóbereniń tárbıesin tasada qaldyrǵan emes. Halqymyz «Otan – qýat, otbasy – shýaq», dep tegin aıtpaǵan. О́ıtkeni otbasylardan memleket quralady. Demek, ár eldiń, ár memlekettiń myzǵymas beriktigi – ár otbasynyń myqtylyǵynda. Sondyqtan otbasy – azamattyń tiregi ǵana emes, qoǵamnyń basty negizi bolyp tabylady. Júzderinen jylylyq esip, kóńilderinen tektiliktiń taby seziletin qos qarııa ańyzdardan syr shertip, qııal-ǵajaıyp ertegilerdi erinbeı-jalyqpaı nemere-shóberelerine oqyp berip otyrǵany. Iá, Serik ata men Manat apa – ónegeli otbasynyń uıytqysy bolyp otyrǵan asyl jandar. Adamnyń baqyty degen osy emes pe.
Jambyl oblysy,
Baızaq aýdany,
Túımekent aýyly.