13 naýryzda Baký qalasynda Qazaqstannyń eńbek sińirgen qaıratkeri, «Parasat», úshinshi dárejeli «Barys» ordenderiniń ıegeri, Almaty qalasynyń Qurmetti azamaty, talantty sýretshi Alpysbaı Qazǵulovqa Túrki dúnıesi Kórkemsýret akademııasynyń ataǵy berildi. Bul – qazaq beıneleý óneriniń has talantynyń uzaq jylǵy eńbegine berilgen úlken baǵa, dep jazady Egemen.kz.
Alpysbaıdyń basty aıyrmashylyǵy – kóp izdenedi, kóp eńbektenedi. Únemi bilimin jetildirip otyrady. Toldym demeıdi, boldym demeıdi. Alpysbaıdyń tabandylyǵy men eńbeksúıgishtik qasıetterine rıza bolmaý múmkin emes. Onyń osy qasıetteri óz nátıjesin bermeı qalǵan joq. Ol beıneleý ónerindegi óz jolyn, derbes stılin qalyptastyrdy. Alpysbaı kartınalarynda ekspressıvtik bir kúsh bar. Emosıonaldyq alabóten yrǵaǵy qalyptasqan sheberdiń kartınalary kórermendi tartyp turatyn qarym-qabileti osy kúshinde jatyr.
Onyń kartınalary etnografııalyq mazmun men ulttyq dástúrge óte baı. Týyndylarynda adam janyn, onyń psıhologııalyq kóńil kúıin ádemi asha biledi. Sýretshi ulttyq naqyshtyń kontekstinde ózindik tús erekshelikterin tıimdi paıdalanatyny da onyń shyǵarmashylyǵyn joǵary deńgeıge kóterip tur.
Almatyda baldyrǵan sýretshilerdiń kórmesi ashyldy
Kez kelgen sýretshi úshin tús pen keńistikti sezine bilý – óte mańyzdy. Osy oraıda Alpysbaı úlken bıikke kóterile aldy. Jaryqty da jaqsy kóre biledi. Talantty sýretshiniń kartınalarynda sıýjettiń shıelenisýi men kýlmınasııasy bir lınııada ushtasyp jatatyny da onyń sheberligi óz shyńyna jetkenin kórsetedi. Onyń kartınalary kórýshige erekshe psıhologııalyq áser etedi. Týyndylary kórermendi jıvopıstiń barlyq parametrleri boıynsha yntyqtyryp qoıatyny da sýretshi shyǵarmashylyǵynyń tylsym kúshke toly ekenin bildirse kerek.
Balań sýretshiler Táýelsizdik kúnine tartý jasady