Karantın rejimi bastalǵan 24 naýryzdan beri Soltústik Qazaqstan oblysynda indetti juqtyrǵan 36 adam tirkeldi. Sonyń 12-si syrttan kelgender. Bular Mysyr, Ulybrıtanııa jáne Reseıdiń Omby, Qorǵan, Chelıabınsk, Túmen oblystarynan kelgen jerlesterimiz. Qalǵan 24-i Petropavl qalasy, Mamlıýt, Taıynsha, Qyzyljar, Ǵ.Músirepov aýdandarynyń turǵyndary.
Indetke ushyraǵandardyń bári №1 qalalyq aýrýhanadaǵy ınfeksııa bólimine jatqyzyldy. Mundaǵy dárigerler Ǵ.Syzdyqova, A.Qasybaeva, Á.Omarálıev, medbıkeler Shtol, Shırochenko, Poberejnık, Sergeeva, sanıtar-tazalyqshylar Aıtmaǵambetova, Qadyrova, Rojkova, Bajenova, Lýsenkolar úı betin kórmeı, aýysymnan keıin ústi-bastary dızenfeksııalanyp, arnaıy kólikpen «Altyn Orda» qonaqúıindegi arnaıy jasaqtalǵan nómirlerge jetkizilip otyrdy. Qazir provızorda 34 naýqas jatyr, karantınde 53 jáne úı karantıninde 408 adam otyr.
Oblys ákimi Qumar Aqsaqalov teledıdardan jıi brıfıng berip, halyqty únemi karantın rejimin saqtaýǵa úndep otyrdy. Ol keıbir edireńdep sóıleıtin basshylardaı emes, halyqtan yńǵaısyz jaǵdaı úshin keshirim surap, dárigerler men polıseılerdiń qyzmetterine alǵysyn bildirdi. «Arbanyń aldyńǵy dóńgelegi qaıda júrse, sońǵysy solaı júredi» demekshi úlken ákimniń úlgisimen kishi ákimder de halyqpen sóılesýde dıplomatııalyq ádepti saqtap, jumsaq sóıledi. Mysaly, solardyń qatarynda qala ákimi Bolat Jumabekov pen onyń orynbasary Asqar Habıbýlındi aıtýǵa bolady.
Búginde Soltústik Qazaqstan oblysy indetti juqtyrǵandardyń sany jaǵynan eń sońǵy orynda tur. Jasyratyny joq, indet bastalǵanda aldyńǵy oryndardyń birinde bolǵan edi. Qazir ınfeksııalyq bólimde 6 adam emdelýde, al 29 adam táýir bolyp shyqty. Bir adam Kókshetaý qalasyndaǵy aýrýhananyń ınfeksııalyq bólimine jatqyzylǵan. Sonymen birge karantındik rejimniń shekteýleri de munda barynsha azaıtylyp, halyq erkin tynystaı bastady. Osy jetistiktiń bári – tártipke múltiksiz baǵynǵannyń paıdasy, árıne. Al oǵan qol jetkizýde halyqtyq dıplomatııa da óziniń rólin atqardy.
Soltústik Qazaqstan oblysy