Oral qalasynda Uly Otan soǵysynyń ardageri, Batys Qazaqstan oblysy Azamattyq qorǵanys shtabynyń birinshi basshysy Shúkir Omaruly Muhtarovqa arnalǵan eskertkish taqta ashyldy.
Batys Qazaqstan oblysynda Azamattyq qorǵanys shtaby tuńǵysh ret 1962 jyly qurylǵan. Onyń birinshi basshysy bolyp Uly Otan soǵysyna qatysýshy polkovnık Shúkir Muhtarov taǵaıyndalǵan eken. II dúnıejúzilik soǵystyń qandy qyrǵynyn kózimen kórgen maıdanger halyq qaýipsizdigi jolyndaǵy jumystardy óńirde uıymdastyryp, azamattyq qorǵanys júıesiniń negizin qalady.
Shúkir Muhtarov 1922 jyly Batys Qazaqstan oblysynyń Taıpaq aýdany Bazartóbe aýylynda dúnıege kelgen eken. Almaty qalasyndaǵy №12 orta mektepti bitirip, 1941 jyldyń jeltoqsan aıynda Keńes ásker qataryna shaqyryldy. Soǵysta «Mars» operasııasyna, Velıkolýk jáne Nevel operasııalaryna qatysqan Sh.Muhtarov KV tankiniń mehanık-júrgizýshisi bolǵan. Jaýyngerlik erligi úshin «Qyzyl Juldyz», II dárejeli Otan soǵysy ordenimen, «Kenıgsbergti alǵany úshin», «Germanııany jeńgeni úshin» medalimen jáne basqa da nagradalarmen marapattalǵan.
- Uly jeńistiń 75 jyldyǵy toılanyp otyrǵan bıylǵy jyly óńirde soǵys ardagerlerine kórsetiletin qurmet pen taǵzym sharalary júıeli uıymdastyrylyp jatyr. Ras, karantın sharttaryna baılanysty mundaı sharalardyń ótkizilý formasy ózgerdi. Biraq óńirdegi bir de bir ardager bizdiń nazarymyzdan tys qalǵan joq. Búgingi shara da aǵa urpaqtyń erligi men eńbegine kórsetilgen laıyqty baǵa dep oılaımyn, - dedi eskertkishtiń ashylý saltanatyna qatysqan Batys Qazaqstan oblysy ákiminiń birinshi orynbasary Muhtar Mankeev.
Jıynǵa Batys Qazaqstan oblysy tótenshe jaǵdaılar departamentiniń bastyǵy general-maıor Jasulan Jumashev, Shúkir Omarulynyń uly men týystary qatysty. Jıylǵan halyq eskertkish taqtaǵa gúl shoqtaryn qoıdy.
Batys Qazaqstan