Memleket basshysy Qasym-Jomart Toqaev belgili jýrnalıst, «Jetisý» telearnasynyń dırektory Beısen Quranbektiń qaıtys bolýyna baılanysty onyń otbasy men jaqyn týystaryna kóńil aıtyp, jedelhat joldady. Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
«Belgili jýrnalıst, tanymal telejúrgizýshi Beısen Quranbektiń dúnıeden ótýine baılanysty aýyr qaıǵylaryńyzǵa ortaqtasyp, kóńil aıtamyn. Beısen Quranbek qazaq jýrnalıstıkasynda ózindik orny bar, kásibı qoltańbasyn qalyptastyrǵan azamat edi. «Qazaqstan» ulttyq telearnasyndaǵy «Aıtýǵa ońaı», «Qareket» baǵdarlamalaryn júrgizip, eldiń ystyq yqylasyna bólendi, halyqtyń alǵysyn aldy. Ol Almaty oblystyq «Jetisý» arnasynyń dırektory retinde bilikti basshy, utqyr uıymdastyrýshy ekenin de kórsete bildi. Marqumnyń topyraǵy torqa, jatqan jeri jaıly, ımany salamat bolsyn!», – delingen jedelhatta.