Batys Qazaqstan oblysy aýmaǵyndaǵy oblystyń bas sanıtarlyq dárigeri Muhamǵalı Aryspaevtyń qaýlysymen karantın rejimi 15 maýsymǵa deıin uzartyldy. 15 maýsymǵa deıin aýrýshańdyq deńgeıi 2%-dan tómen bolǵan jaǵdaıda karantın toqtatylýy múmkin. Bul týraly Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev aıtyp berdi.
Jalpy óńir boıynsha kúni búginge deıin 86 oshaqtan COVID-19 dıagnozymen 370 jaǵdaı tirkelgen eken. Sonyń ishinde 11 adam – 14 jasqa deıingi balalar. 23 mamyr kúngi aýrýdyń ósimi – 2,8%-dy qurap otyr.
- Jalpy anyqtalǵan naýqastardyń 251-i aýrýdy syrttan juqtyrǵan. Bul barlyq naýqastyń 67,8%-y. Al 114 jaǵdaıda indet aýyrǵan adamdarmen qarym-qatynas arqyly juqqan. Olardyń 63-i – medısına salasynyń qyzmetkerleri, beseýi – polısııa qyzmetkeri. Úı jaǵdaıynda oqshaýlanyp, otbasy múshelerine indet juqtyrǵan 43 oqıǵa anyqtaldy. Búgingi tańda oblystyq juqpaly aýrýlar aýrýhanasynda 144 naýqas tıisti emin alyp jatyr. Provızorlyq stasıonarda – 24, karantındik stasıonarda – 217 adam, úı jaǵdaıynda – 1208 adam oqshaýlanýda, - deıdi Nurlybek Ermekuly óńirde qalyptasqan epıdemıologııalyq ahýalǵa sholý jasap.
Osy kezge deıin negizinen shekara beketi men Oral qalasynan ǵana shyǵyp kelgen aýrý oshaǵy endi aýdandarǵa da tarala bastaǵany alańdatyp otyr. Máselen qazir koronavırýs juqpasymen Aqjaıyq aýdanynda 5 jaǵdaı tirkelse, Bórli aýdanynda – 7 jaǵdaı, Báıterek aýdanynda – 3 jaǵdaı, Syrym aýdanynda – 4 jaǵdaı, Tasqala aýdanynda – 10, Terekti aýdanynda – 1 jaǵdaı tirkeldi.
Jalpy óńirde COVID-19 dıagnozymen tirkelgenderdiń 275-i – Batys Qazaqstan oblysynyń turǵyndary. 84 adam – Qazaqstan Respýblıkasynyń ózge aımaqtarynan bolsa, 7 adam – sheteldik eken.
Koronavırýsty juqtyrǵandardyń 182-si – Reseı Federasııasynan, 68-i – kórshiles Atyraý oblysy aýmaǵynan, al 1 adam – Germanııadan kelgen.
Eki márte test saraptamasynan ótip, jazylǵandyǵy anyqtalǵan 220 adam qazir aýrýhanadan shyǵarylyp, óz úıine jiberilgen. Biraq olar odan ári úı jaǵdaıynda 14 kúndik oqshaýlaný tártibin saqtaýy tıis.
О́tken táýlikte óńirdegi munaı óndirýshi eń alyp kompanııa – Qarashyǵanaq Petroleým Opereıtıng b.v. kompanııasynyń bir qyzmetkeri COVID-19 dıagnozymen aýrýhanaǵa tústi. Tekseris nátıjesi kórsetkendeı, ol vahtaǵa keter aldynda Oral qalasynda Teńiz kenishinde vahtalyq jumys isteıtin týysymen jolyqqan eken. Endi QPO kompanııasynyń onymen qarym-qatynasta bolǵan áriptesteri túgel oqshaýlanyp, provızorlyq baqylaýǵa alyndy.
Úı jaǵdaıynda oqshaýlanǵan azamattardyń saldyr-salaqtyǵy men jaýapsyzdyǵy da indettiń taralýyna áser etip tur. Nurlybek Mustaevtyń aıtýynsha, Syrym aýdanynda «14 kún boıy úıde oqshaýlandym» degen turǵynnyń Oral qalasyna kelip-ketkendigi anyqtalypty. Iаǵnı onyń qansha adamǵa indet juqtyryp úlgergeni belgisiz. Qazir Syrym aýdandyq sanıtarlyq dárigeriniń qaýlysymen aýdan aýmaǵynda da karantın jarııalandy.
Batys Qazaqstan