Abaı Qunanbaıulynyń 175 jyldyǵyna oraı Qazaq ulttyq qyzdar pedagogıkalyq ýnıversıtetinde «Vızýaldy ónerde Abaı álemin beıneleý» taqyrybyndaǵy respýblıkalyq jas sýretshiler baıqaýy márege jetti.
Kásiptik bilim kafedrasynyń muryndyq bolýymen uıymdastyrylǵan shyǵarmashylyq saıysqa kolledj jáne mektep bitirýshi túlekter qatysyp, ózderiniń tyrnaqaldy týyndylaryn usyndy.
– Baıqaýǵa qaǵaz betine nemese kenepke túrli-tústi boıaýmen nemese grafıkalyq quraldarmen Abaı Qunanbaıulynyń shyǵarmalaryna arnalyp salynǵan jumystar qabyldandy. Sýretti salýǵa bar bolǵany 2 saǵat ýaqyt bólindi. Zoom platformasy arqyly komıssııa músheleriniń baqylaýymen qatysýshylardyń týyndylary baǵalandy. Alǵashqy saıysqa 26 jas talap qatysyp, baqtary men baptaryn synady, – deıdi Kásiptik bilim kafedrasynyń meńgerýshisi Rahııa Darmenova.
Onlaın formatta ótken shyǵarmashylyq saıysta birinshi oryndy «Jelsiz túnde jaryq aı» taqyrybyndaǵy kartınany salǵan Qyzylorda oblysynyń Aral aýdanyndaǵy №260 mekteptiń 11-synyp oqýshysy Farıda Jolmyrzaeva ıelendi. Ekinshi orynǵa «Abaıtaný» týyndysymen daıyndyq kýrsynyń tyńdaýshysy Búldirshin Turdybaı laıyq dep tanylsa, úshinshi oryn «Qansonarda búrkitshi shyǵady ańǵa» atty sýrettiń avtory Almaty tehnologııa jáne florıstıka kolledjiniń stýdenti Merýert Sadyqovaǵa buıyrdy.
Sonymen birinshi oryn alǵan boıjetken Qyzdar ýnıversıtetinde oqýǵa bir jyldyq oqý aqysyna 50 paıyzdyq, ekinshi oryn alǵan qyz 25 paıyzdyq jáne úshinshi oryn alǵan qatysýshy 15 paıyzdyq jeńildik alady.
– Abaı týraly, onyń poezııasy jaıly az aıtylǵan joq. Alaıda, búgin men bolashaqtyń altyn dińgegine aınalǵan oıshyldyń tulǵasyn tolyq tanyp úlgerdik deý asyǵystyq. Syry men jumbaǵyn ishine búkken shyǵarmalary áli de barshylyq. Bul onyń tym tereńdigin ańǵartsa kerek. Adamzattyń aqylmany eń aldymen ultyn sheksiz súıýdiń qandaı bolatynyn kórsetti. Synady, synaý arqyly ultynyń ósip-órkendegenin kózdedi. Abaıdyń ereksheligi – nadandyqtyń ornyna bilimpazdyqty, taıtalastyń ornyna tatýlyqty, dańǵoılyqtyń ornyna danalyqty sińistirip, halqymyzdyń rýhanı qasıetterin pash etkendigi. Aqyn mereıtoıy qarsańynda tuńǵysh ret uıymdastyrylǵan baıqaý Abaı ulylyǵyn jastar arasynda keńinen dáripteýdi maqsat tutýdan týyndady, – deıdi Qazaq ulttyq qyzdar pedagogıkalyq ýnıversıtetiniń Baspasóz jáne qoǵammen baılanys bóliminiń basshysy Jandar Asan.
ALMATY